АҚШдаги энг катта ижтимоий тармоқлардан бири ҳисобланган TikTok атрофида муҳим келишувга эришилди. Маълум қилинишича, дастурнинг асосий компанияси ByteDance’дан ажратилиши юзасидан янги битим имзоланди ва унинг Америкадаги бўлинмаси тахминан 14 миллиард доллар қийматда баҳоланди. Бу ҳақда Оқ уй вице-президенти J.D. Венс маълумот берди.
Президент Доналд Трамп Овал офисда фармон имзолаб, келишув шартларини якунлаш ва амалга ошириш учун 120 кунлик муддат белгилади. Таҳлилчиларга кўра, бу қадам TikTok’нинг АҚШдаги келажаги учун ҳал қилувчи аҳамиятга эга.
Келишув шартларига кўра, Oracle корпорацияси, Silver Lake хусусий инвестиция фонди ва Абу-Дабида жойлашган MGX суверен фонди TikTok’нинг АҚШдаги 45 фоиз акцияларига эгалик қилади. ByteDance ўз қўлида 19,9 фоиз улушни сақлаб қолади, қолган 35 фоиз эса америкалик инвесторлар ўртасида тақсимланади.
Оқ уй тарқатган маълумотда таъкидланишича, янги битим TikTok’нинг алгоритмлари ва контентни назорат қилиш жараёнларини қўшма корхона тасарруфига ўтказади. Шу билан бирга, Oracle илованинг маълумот хавфсизлиги ва тавсиялар тизимида асосий бошқарувчи сифатида қатнашади. Мақсад – платформанинг АҚШ фойдаланувчилари учун хавфсизлигини таъминлаш ва шахсий маълумотларни ҳимоя қилиш.
Шунингдек, келишувда машҳур инвесторлар — Руперт Мердок ва Майкл Делл иштирок этгани ҳам қайд этилган. TikTok ҳозирда АҚШда ойига 170 миллиондан ортиқ фаол фойдаланувчига эга бўлиб, мамлакатдаги энг оммабоп платформалардан бири сифатида эътироф этилмоқда.
Бироқ келишувнинг халқаро сиёсий томони ҳам йўқ эмас. У Хитой билан олиб борилаётган музокаралар фонида амалга оширилди. Президент Трамп Си Тсзинпин билан мулоқотини ижобий баҳолаб, келишувга Пекин ҳам розилик берганини таъкидлади. Шу билан бирга, баъзи сиёсатчилар битим шартлари алгоритм устидан тўлиқ назорат бермаслигидан хавотир билдирмоқда.
Мутахассислар фикрича, ушбу келишув TikTok учун янги босқични бошлаб бериши мумкин. У нафақат бозордаги мавқеини мустаҳкамлайди, балки АҚШ ва Хитой ўртасидаги иқтисодий муносабатлар тараққиётига ҳам таъсир кўрсатади.
«Замин»ни Telegram’да ўқинг!
