Жанубий Кореянинг Конгвандо провинцияси Инже шаҳрида 21–26 сентябрь кунлари ўтказилган нуфузли халқаро мусобақада Ўзбекистон ҳарбийлари барча рақиблардан устун келиб, муносиб ғалабага эришди. Бу ҳақда Мудофаа вазирлиги расман маълумот тарқатди.
Қуруқлик қўшинлари Илмийлаштирилган машғулот марказида ташкил этилган учинчи халқаро илмий-жанговар тайёргарлик мусобақасига Корея, АҚШ, Янги Зеландия, Камбоджа ва НАТО қўшма гуруҳидан ташқари 16 та жамоа ва 500 га яқин ҳарбий хизматчи қатнашди.
Беллашув дастури жуда серқирра бўлиб, аввало ҳар бир жамоа оператив режа тайёрлаш, миллий келишув бўйича мажбуриятларни бажариш ва бўлинмаларнинг қўшма операцияларида зарур бўладиган кўникмаларни мустаҳкамлади. Шундан сўнг қуръа ташлаш орқали асосий босқичлар бошланди.
Мусобақа қоидаларига кўра, иштирокчилар тоғолди, ўрмон ва шаҳар шароитида ўтказилган шартли жанговар симуляциялар орқали 12 босқичли синовларда иштирок этишди. Ҳар бир босқичда тактик вазиятга мос ҳаракат қилиш, жанговар қоидаларга риоя этиш, шартли душманни йўқотиш ва омон қолиш даражаси каби кўрсаткичлар чуқур таҳлил қилинди.
Ўзбекистон ҳарбийлари бу беллашувда ўз маҳорат ва тезкорлиги билан алоҳида ажралиб турди. Улар шартли душманнинг асосий қўмондонлик пунктини қўлга олиш учун атиги 21 дақиқа сарфлади. Бу натижа мусобақадаги олдинги рекорд – 33 дақиқани ортда қолдирди. Шунингдек, мудофаа жараёнида душман кучларини йўқотиш учун 25 дақиқа етарли бўлди ва бу кўрсаткич ҳам аввалги энг яхши вақтдан (29 дақиқа) анча юқори бўлди.
Экспертлар таъкидлашича, ўзбек ҳарбийларининг бундай натижаси нафақат юксак тайёргарлик ва интизом самараси, балки уларнинг жаҳон миқёсида рақобатбардош куч сифатида шаклланаётганини ҳам намоён этмоқда.
Шу тариқа, Кореядаги мусобақа нафақат ўзбек армиясининг шарафини янада баланд қилди, балки миллий ҳарбий мактабнинг замонавий йўналишларда қанчалик кучли ривожланаётганини ҳам кўрсатди.
«Замин»ни Telegram’да ўқинг!
