Россия пойтахтининг жануби-шарқий қисмидаги ётоқхоналарда ўтказилган кенг кўламли рейд жамоатчилик эътиборини тортиб, катта муҳокамаларга сабаб бўлди. Россия Миллий гвардияси маълумотига кўра, “Авангард” ва “Қилич” номли махсус ОМОН бўлинмалари иштирок этган операцияда 70 дан зиёд мигрант қўлга олинган.
Тергов қўмитаси, ФХХ ҳамда Ички ишлар вазирлигига кўмак сифатида амалга оширилган тадбир Шкулева кўчасидаги бир неча ётоқхоналарда ташкил этилди. Рейд пайтида хавфсизлик кучлари мингдан ортиқ хорижий фуқарони текширди. Шулардан 72 нафар шахс иммиграция қоидалари ва ҳарбий рўйхатга олиш талабларини бузгани учун ушланди. Улар полиция бўлимларига олиб кетилиб, қўшимча тергов ишлари ўтказилмоқда.
Айни вақтда қўлга олинганлар орасида Марказий Осиё, жумладан, Ўзбекистон фуқаролари бор-йўқлиги ҳақида расмий маълумот берилмаган.
Эслатиб ўтамиз, шу йилнинг 22 сентябрь куни ҳам шунга ўхшаш ҳолат қайд этилган эди. Красноярск ўлкасининг Емельяновский туманида OМОН ходимлари ўзбекистонлик хонанда Жалолиддин Аҳмадалиев концерти бўлиб ўтган “Корона” банкет залига бостириб кириб, мигрантлар орасида текширув ўтказган. Ўша пайтда 8 ўзбекистонликка нисбатан ҳуқуқий чоралар кўрилган, тўрт нафарига жарима ва маъмурий чиқариб юбориш жазоси тайинланса, қолганлари махсус марказга жойлаштирилган эди.
Ўзбекистон Ташқи ишлар вазирлиги ва Миграция агентлиги мазкур ҳолатлар юзасидан фуқаролар ҳуқуқларини ҳимоя қилиш мақсадида адвокатларни жойига юборгани, Бош консулхона эса зарур ҳуқуқий ёрдам кўрсатиш чораларини кўраётганини маълум қилган.
Шу билан бирга, “Юксалиш” ҳаракати раҳбари ва депутат Бобур Бекмуродов бундай вазиятларда ОМОН каби махсус кучларни жалб қилиш ортиқча эканини таъкидлаб, ҳуқуқни муҳофаза қилувчи органларни ҳуқуқий йўлдан чиқмасликка чақирди.
Экспертлар фикрича, Россияда мигрантлар билан боғлиқ бундай рейдлар тобора кўпаймоқда ва уларнинг ҳуқуқий асослари, самараси ҳамда ижтимоий оқибатлари жамоатчилик орасида баҳсларга сабаб бўлмоқда.
“Zamin”ни Telegram'да ўқинг!
