Сунъий интеллект соҳасида етакчи сифатида танилган OpenAI тарихий маррага етди. ChatGPT платформаси орқали машҳур бўлган компаниянинг қиймати 500 миллиард долларга баҳоланиб, дунёдаги энг қиммат хусусий компания мақомини қўлга киритди. Бу ҳақда Bloomberg ва Reuters агентликлари маълум қилди.
Маълумотларга кўра, компаниянинг собиқ ва амалдаги ходимлари инвесторларга тахминан 6,6 миллиард долларлик акцияларни сотган. Илк босқичда улар 10,3 миллиард долларлик акцияларни сотишга розилик берган бўлса-да, кўпчилик OpenAI бизнесининг истиқболига ишонгани учун бундай қадамдан қайтди.
Аввалроқ компаниянинг умумий қиймати тахминан 300 миллиард доллар атрофида баҳоланган эди. Янги баҳолаш натижасида OpenAI қиймати Илон Маскнинг SpaceX компаниясидан ҳам ошиб кетди. SpaceX ҳозирда 400 миллиард долларга яқин қийматга эга бўлиб, дунёдаги хусусий компаниялар орасида иккинчи ўринни эгаллади. Учинчи ўрин эса TikTok’нинг эгаси бўлган Хитой компанияси ByteDance ҳиссасига тўғри келмоқда.
OpenAI’нинг ўсиши унга бўлган катта қизиқиш билан изоҳланмоқда. 2025 йил июль ҳолатига кўра, ChatGPT ҳафтасига тахминан 700 миллион фаол фойдаланувчига эга. Платформа орқали бир ҳафта ичида 18 миллиард хабар алмашилгани қайд этилган.
Қизиғи шундаки, компания асосчиларидан бири ҳисобланган Илон Маск 2018 йилда директорлар кенгашини тарк этган бўлса-да, 2025 йил бошида OpenAI’ни 97,4 миллиард долларга сотиб олиш таклифини билдирган. Миллиардер 2024 йилда компанияга қарши суд иши ҳам қўзғатган. Маскнинг фикрича, OpenAI’нинг Microsoft билан ҳамкорлиги ва тижорат йўналишига ўтиши дастлабки мақсадларга зид эди.
Бироқ OpenAI декабрь ойида эълон қилган ҳужжатлар Маскнинг ўзи вақт ўтиб тижорат ташкилотига айланиш ғоясини қўллаб-қувватлаганини очиқлади. Аммо у компания устидан тўлиқ назоратга эга бўлолмагани сабабли бу ғоядан воз кечгани қайд этилди.
Bloomberg таҳлилига кўра, OpenAI қийматининг ошиши бутун сунъий интеллект соҳасидаги қизғин рақобат ва инвесторлар қизиқишининг кучайиб бораётганидан далолат беради. Масалан, сентябрь ойининг охирида чип ишлаб чиқарувчи Nvidia OpenAI’га тахминан 100 миллиард долларлик сармоя киритиш нияти борлигини ва компанияга маълумот марказлари учун чиплар етказиб беришини маълум қилган.
“Zamin”ни Telegram'да ўқинг!
