Қозоғистон ҳукумати мамлакатда соғлом турмуш тарзини қарор топтириш мақсадида спиртли ичимликлар савдосига нисбатан янги чекловлар жорий этишни режалаштирмоқда, деб хабар берди Kazinform.kz.
Ички ишлар вазири Ержан Саденовнинг таъкидича, янгиланган қонун лойиҳасига кўра, алкогол маҳсулотлари фақат махсус лицензияга эга дўконларда сотилиши мумкин бўлади. Бундан ташқари, онлайн тарзда спиртли ичимликлар савдоси бутунлай тақиқланиши кутилмоқда.
Вазирлик, шунингдек, савдо нуқталари сонини қисқартириш ва лицензия талабларини кучайтириш орқали назоратни мустаҳкамлашни таклиф қилмоқда. Мақсад — ички бозорда алкогол тарқалишини чеклаш ва унинг салбий ижтимоий оқибатларини камайтириш.
Саденов парламентдаги муҳокама пайтида таъкидлашича, кўнгилочар жойларда маст ҳолатда жиноят содир этиш ҳолатлари кескин кўпайган. “Фақат ўтган йили шундай жойларда 1400 дан ортиқ ҳуқуқбузарлик, жумладан, учта қотиллик аниқланган. Бу — жиддий хавф,” деди вазир.
Унинг фикрича, спиртли ичимликлар савдосини вақт жиҳатидан чеклаш, жамоат хавфсизлиги ва фуқаролар соғлиғини сақлаш учун муҳим қадам бўлади.
Шу билан бирга, вазир мамлакатда соғломлаштириш ва реабилитация марказлари етишмаётганини қайд этди. Ҳозирги кунда бор-йўғи 38 та марказ фаолият юритмоқда, уларда 700 га яқин ўрин мавжуд холос. Муаммоларни ҳал этиш учун яна 14 та янги муассаса ташкил этиш режалаштирилган.
Маълумот учун, Қозоғистонда алкогол савдосига оид чекловлар сўнгги йилларда босқичма-босқич кучайтирилмоқда. 2014 йилдан буён кучли спиртли ичимликларни соат 21:00 дан 12:00 гача, енгилларини эса 23:00 дан 8:00 гача сотиш тақиқланган.
Янги қонун қабул қилинса, мамлакатда спиртли ичимликлар муомаласи янада қатъий назоратга олиниб, соғлом турмуш маданиятини шакллантиришга йўналтирилган янги давр бошланиши кутилмоқда.
