Россиянинг Амур вилоятида рўй берган йўл-транспорт ҳалокати жамоатчилик эътиборини тортди. Аввалроқ оммавий ахборот воситаларида Ўзбекистон, Туркия ва Тожикистон фуқароларини ташиган автобус ағдарилиб кетгани ҳақида хабарлар тарқалганди. Бироқ расмий манбалар бу маълумотни рад этди, деб хабар берди Миграция агентлиги.
Маълум қилинишича, 16 октябрь куни Амур вилояти ҳудудидаги Благовешенск–Свободний йўлининг 19-чақириғида йўловчи автобус ва енгил автомобиль иштирокида йўл ҳодисаси содир бўлган. Аварияга учраган автобус Туркиянинг йирик қурилиш компанияси “Yamata”га тегишли бўлган.
Ўзбекистоннинг Хабаровск шаҳридаги Бош консулхонаси ҳамда Миграция агентлигининг Россия Федерациясидаги ваколатхонаси тезкор тарзда суриштирув ўтказган.
Текширув натижасида маълум бўлишича, автобусда Ўзбекистон фуқаролари бўлмаган. Расмий маълумотларга кўра, ҳалокат натижасида бир йўловчи ҳалок бўлган, яна 14 киши турли даражада тан жароҳати олган.
Миграция агентлиги қайд этишича, агентлик Россия ҳудудида бўлиб турган барча ватандошлар хавфсизлигини таъминлаш масалалари бўйича Россиядаги тегишли ташкилотлар билан доимий ҳамкорликда иш олиб бормоқда.
Туркия компаниясига тегишли автобуснинг ҳалокати сабаблари ҳозирда маҳаллий ҳуқуқни муҳофаза қилувчи органлар томонидан ўрганилмоқда.
“Zamin”ни Telegram'да ўқинг!
