Қорақалпоғистон миллий таомлари орасида алоҳида ўрин тутадиган “Балиқ қарма” энди расман патентдан ўтди. Адлия вазирлигининг маълум қилишича, мазкур таом географик кўрсаткич сифатида давлат рўйхатига киритилди.
Бу қарор билан “Балиқ қарма” номи ва унинг анъанавий тайёрланиш усули ҳуқуқий жиҳатдан ҳимояланади. Шу билан бирга, сифат стандартлари мустаҳкамланиб, Қорақалпоғистоннинг гастрономик брендини кенгроқ тарғиб этиш имкони яратилади.
Мазкур таом Орол денгизи ва Амударё дельтасига яқин ҳудудларда шаклланган қадимий балиқчилик анъаналарига асосланган. Унинг тайёрланиш услуби ҳам ўзига хос: пиширилган балиқ, шўрва, майда тўғралган сабзавотлар ва 1×1 ёки 2×2 сантиметрли қуритилган хамир бўлакларидан иборат. Таомнинг юзасидан олинган ёғ пиёз устига қуйилиб, ўзига хос таъм ва ҳид беради.
Мутаҳассислар таъкидлашича, географик кўрсаткич — бу маҳсулотнинг маълум ҳудуд билан боғлиқлигини, унинг сифати ва машҳурлигини ифода этувчи интеллектуал мулк тури ҳисобланади.
Шу тариқа, “Балиқ қарма” нафақат миллий таом сифатида, балки Қорақалпоғистоннинг маданий ва гастрономик меросини намоён этувчи брендга айланди.
“Zamin”ни Telegram'да ўқинг!
