Қорақалпоғистонда жаҳон илмий ҳамжамиятини ҳайратга солган топилма аниқланди — Султон Увайс тоғларида тахминан 75 миллион йил аввал яшаган динозаврнинг тошга айланган суяк қолдиқлари топилди. Бу ҳақда Ўзбекистон Давлат геология музейи маълум қилди.
Маълумотларга кўра, қазилма тадқиқотлари Қорақалпоқ давлат университети ва Геология музейи олимлари ҳамкорлигидаги экспедиция давомида амалга оширилган. Текширувлар чоғида қадимги йиртқич калтакесакка тегишли бўлиши мумкин бўлган суяк бўлаклари — умуртқа қисмлари, болдир суяги ва бошқа элементлар топилган.
Геология музейи директори Аҳмаджон Аҳмедшаевнинг таъкидлашича, ушбу суяклар бўр даврига мансуб бўлиб, уларнинг аниқ тури ва илмий таснифи халқаро мутахассислар иштирокидаги лаборатория таҳлилларидан сўнг эълон қилинади.
Ҳозирда ноёб намуналар илмий лабораторияларда махсус ускуналар ёрдамида ўрганилмоқда. Тадқиқот натижалари динозаврлар эволюцияси ва Марказий Осиё геологик тарихи бўйича муҳим маълумотларни очиб бериши кутилмоқда.
Олимлар бу топилмани Ўзбекистондаги палеонтологик изланишлар учун янги босқич деб баҳоламоқда.
“Zamin”ни Telegram'да ўқинг!
