Украина президенти Владимир Зеленский мамлакат ҳеч қачон ўз ерларини Россияга бермаслигини қатъий таъкидлади, деб хабар берди маҳаллий ОАВ. Унинг сўзларига кўра, Украина ҳудуди фақат украин халқига тегишли бўлиб, унинг бир қарич қисми ҳам “босқинчига совға қилинмайди”.
“Украинлар ҳеч кимга ер бермайди. Биз босқинчига ҳеч нарса совға қилмаймиз. Бу ҳақдаги жавоб Конституцияда аниқ ёзилган — ҳеч ким ундан четга чиқа олмайди”, — деди Зеленский мамлакат телевидениесидаги мурожаатида.
Президент бу фикрларни АҚШнинг собиқ раҳбари Дональд Трамп ва Россия президенти Владимир Путин ўртасида Украина иштирокисиз ўтган эҳтимолий музокаралар фонида билдирди. У бу каби келишувларни “ҳуқуқий кучга эга бўлмаган” ва “янги уруш хатарини кучайтирадиган” ҳаракат сифатида баҳолади.
Зеленскийнинг таъкидлашича, урушни тугатиш керак, лекин буни Украина эмас, Россия амалга ошириши лозим. “Биз ўз еримиз учун курашишни тўхтатмаймиз”, — деди у.
Шунингдек, давлат раҳбари Украина ҳудудий яхлитлиги ҳеч қачон музокара мавзуси бўлмаслигини, ҳар қандай келишув мамлакат иштирокисиз қабул қилинса, у ҳақиқий тинчликка олиб келмаслигини қўшимча қилди.
“Zamin”ни Telegram'да ўқинг!
