Туркия ва Ўзбекистон ўртасида стратегик шериклик янги босқичга кўтарилиши мумкин. Туркия Ички ишлар вазирлигида бўлиб ўтган учрашувда икки давлат фуқаролари учун қулайлик яратишга қаратилган қатор ташаббуслар муҳокама қилинди, деб хабар берди маҳаллий ОАВ.
Учрашувда вазир ўринбосари Меҳмет Ақташ Ўзбекистон билан муносабатлар изчил ривожланаётганини таъкидлаб, фуқаролар учун бир нечта янги имкониятлар ҳақида маълумот берди.
Жумладан, Туркия ҳукумати Ўзбекистон фуқаролари учун иш визасини электрон тарзда расмийлаштириш тизимини жорий этишни кўриб чиқмоқда. Бу ҳужжат тўплаш ва ариза бериш жараёнини анча соддалаштиради.
Шунингдек, мамлакатда бўлиб турган ўзбекистонликлар Туркияни тарк этмасдан туриб, ишлаш рухсатномасини олиш имконига эга бўлиши мумкинлиги муҳокама қилинган.
Томонлар ноқонуний миграцияни тартибга солиш ва қонун бузган фуқароларни аниқлаш учун ягона электрон маълумот базасини яратиш масаласида ҳам келишувга яқинлашган.
Қўшимча равишда, икки мамлакат ички ишлар вазирликлари ноқонуний миграцияга қарши кураш ва фуқароларни қайтариш бўйича меморандум тайёрламоқда.
Туркия Ташқи ишлар вазирлигидаги учрашувда эса вазир ўринбосари Муса Кулакликая икки давлатни боғлаб турган тарихий, маданий ва диний яқинликни таъкидлаб, сиёсий ва иқтисодий ҳамкорликни янада кенгайтириш ниятини билдирди.
Музокараларда меҳнат миграцияси соҳасидаги ҳамкорлик узоқ муддатли истиқболга эга экани қайд этилди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
