Россиянинг Сочи шаҳридаги кўп қаватли уйда 31 октябрь куни содир бўлган ёнғин пайтида ўзбекистонлик ҳайдовчи Шерзод Намозовнинг жасурлиги минглаб одамларни lol қолдирди. У ҳаёти хавф остида қолган она ва унинг боласини қутқариб қолди.
Гувоҳларнинг сўзларига кўра, Алпийская кўчасидаги уйнинг юқори қавати ёнғин билан қамралган пайтда, бир аёл боласи билан дераза орқали ёрдам сўраган. Шу заҳотиёқ ўша жойда мижозини тушираётган Шерзод вазиятни кўриб, бир лаҳзада ёрдамга шошилган.
У пастки қават ойнасидан чиқиб, дастлаб болани хавфсиз жойга туширган, сўнгра нарвон ёрдамида онага ёрдам бериб, уни ҳам пастга олиб тушган. Ҳар иккиси ҳам соғ-саломат қутқарилган.
Шерзод Намозов Сурхондарё вилоятининг Термиз тумани Учқизил маҳалласида туғилган. Россияда ҳайдовчилик билан шуғулланади.
“Ёрдамга муҳтож инсонни кўрган одам унга ёрдам беришга шошилиши табиий. Мен фақат инсоний бурчимни бажардим”, — деди у кейинроқ.
Россия Фавқулодда вазиятлар вазирлиги маълумотларига кўра, ёнғин 600 квадрат метр майдонни қамраб олган. Ҳодисада жами уч киши қутқарилган, бир неча киши жароҳатланган.
Мутахассислар Шерзоднинг бу ишини ҳақиқий жасорат деб баҳолаб, унинг ҳаракатини инсонпарварлик намунаси сифатида эътироф этмоқда.
“Zamin”ни Telegram'да ўқинг!
