Хитойнинг Shenzhou-20 миссияси доирасида орбитада хизмат қилаётган уч нафар астронавт Ерга қайтиши кутилганидан кечиктирилди, деб хабар берди mahalliy оммавий ахборот воситалари.
Маълумотларга кўра, уларни олиб келиш учун мўлжалланган қайтиш капсуласи космик чиқиндилар билан тўқнашган бўлиши мумкин. Шу сабабли парвоз бошқарув маркази хавфсизликни биринчи ўринга қўйиб, қўшимча текширувлар ўтказишга қарор қилган.
Диагностика жараёнида капсула юзасида эҳтимолий шикастланишлар аниқланиб, иссиқликдан ҳимоя қопламаси ҳамда бошқарув тизимлари қайта текширилмоқда.
Tiangong станциясида хизмат қилаётган астронавтлар — Чен Дун, Чен Жунжуй ва Ван Цзе — ҳозирча орбитада қолмоқдалар ва ўз вазифаларини бажаришда давом этмоқда. Расмий маълумотларга кўра, уларнинг ҳаёти ёки соғлиғи учун хавф йўқ.
Мутаҳассислар таъкидлашича, орбитадаги асосий муаммолардан бири — космик чиқиндилар ҳисобланади. Улар спутниклар ва ракета бўлаклари, бузилган қурилмалар қолдиқлари ёки ҳатто миллиметр ўлчамдаги металл парчалардан иборат бўлиб, улкан тезликда ҳаракат қилади. Биргина шундай зарба ҳам капсуланинг муҳофаза қопламасини ёриб ўтиши ёки унинг қайтиш тизимини ишдан чиқариши мумкин.
Ҳозирда муҳандислар вазиятни тўлиқ назоратда ушлаб турибди. Барча техник диагностика якунлангач, Shenzhou-20 экипажининг Ерга қайтиш вақти аниқланиши кутилмоқда.
“Zamin”ни Telegram'да ўқинг!
