Эрон пойтахтида сув инқирози тобора кучаймоқда. Расмий маълумотларга кўра, Теҳронда ичимлик суви захиралари икки ҳафта ичида тугаб қолиши мумкин. Президент Масъуд Пезешкиан бу ҳолатни «миллий даражадаги фавқулодда вазият» деб баҳолади.
Теҳрон сув таъминоти компанияси раҳбари Беҳзод Парсийнинг маълум қилишича, шаҳарни сув билан таъминловчи беш омбордан бири — Амир Кабир тўғони ҳозирда атиги 8 фоиз қувватда ишламоқда. Унда фақат 14 миллион куб метр сув қолган. Бир йил аввал бу кўрсаткич 86 миллион куб метрга тенг эди.
Ёғингарчиликнинг камайиши сув сатҳини кескин пасайтириб, ер ости сув манбаларини ҳам қуритиш даражасига етказган. Теҳрон аҳолисининг кунлик сув эҳтиёжи 3 миллион куб метрни ташкил этади, аммо айрим туманларда сув таъминоти аллақачон чекланган.
Мутахассислар ёмғир ёқмаса ва фавқулодда чоралар кўрилмаса, пойтахтда 10 миллионга яқин аҳолининг эвакуация қилиниши эҳтимолини истисно этмаяпти. Бу ҳолат Эрон тарихидаги энг йирик экологик ва гуманитар инқирозлардан бири бўлиши мумкин.
“Zamin”ни Telegram'да ўқинг!
