Афғонистоннинг ғарбий қисмида жойлашган Ҳирот вилоятида аёллар фаолияти ва жамоат жойларига ташрифларига нисбатан янги қатъий чекловлар жорий этилди. Вилоят ҳокими Зана Воҳиднинг янги буйруғига кўра, эндиликда ҳеч бир аёл паранжисиз ҳолда мактаб ҳудудига ёки давлат муассасаларига кириш ҳуқуқига эга бўлмайди.
Маълумотларга қараганда, мазкур тақиқ фақат таълим муассасалари билан чекланмайди — у шифохоналар, давлат идоралари, банклар ва ҳатто қамоқхоналарга ҳам тааллуқли. Гувоҳлар сўзларига кўра, ҳатто ҳижоб кийган аёллар ҳам кўп ҳолларда ичига киритилмаётган ва улар кўчада соатлаб кутишга мажбур бўлмоқда.
Kabul Now нашри ёзганидек, “Толибон”нинг муваққат ҳукумати маҳаллий такси ҳайдовчиларига ҳам бурқасиз аёлларни олиб юрмаслик ҳақида қўшимча кўрсатма берган. Вилоят бўйлаб кўплаб назорат пости ташкил этилган бўлиб, паранжисиз аёлларни ташиган ҳайдовчиларга нисбатан жазо чоралари кўрилмоқда.
Эслатиб ўтиш жоиз, ўтган йилнинг октябрида “Толибон” Ҳирот шаҳридаги аёллар кафесининг фаолиятини ҳам тўхтатган эди — расмий изоҳ берилмаган ҳолда муассаса муҳрланиб, фаолияти чекланган.
Бундан ташқари, сўнгги ойларда “Толибон”нинг олий таълим вазирлиги университетларда ишловчи профессорлар ва маъмурий ходимларга иш вақтида смартфонлардан фойдаланишни тақиқлаган. Вазирлик ҳужжатида бу талаб иш жараёнини самарали қилиш ва ходимларнинг чалғишини олдини олиш мақсадида жорий этилгани таъкидланган.
Шу тариқа, Ҳирот вилоятида аёллар учун эркин ҳаракатланиш ва таълим, тиббиёт соҳаларидаги имкониятлар янада чекланаётгани ҳақида халқаро нодавлат ташкилотлар ҳам ташвиш билдирмоқда.
“Zamin”ни Telegram'да ўқинг!
