Жаҳон соғлиқни сақлаш ташкилоти эълон қилган янгича ҳисоботга кўра, охирги уч ўн йилликда диабетга чалинганлар сони кескин ортиб, 828 миллион нафарга етди. Ташкилот бу ўсишни хавотирли тенденция сифатида баҳоламоқда.
Маълумотларга кўра, 30 ёшдан юқори катталарнинг ярмидан кўп қисми зарур даволанишни олмайди. Энг кўп диабет қайд этилган давлатлар ҳам аниқланган: Ҳиндистонда 212 миллион, Хитойда 148 миллион, АҚШда 42 миллион, Покистонда 36 миллион, Индонезияда 25 миллион ва Бразилияда 22 миллион бемор мавжуд.
ЖССТ бу йилги Жаҳон диабет кунида “Ҳаёт давомидаги диабет” ғоясини илгари суриб, касаллик билан яшовчи ҳар бир инсон тўлиқ тиббий ёрдам, қўлловчи муҳит ва саломатликни рағбатлантирадиган сиёсатларга муҳтож эканини таъкидлади. Ташкилотнинг фикрича, диабетнинг олдини олиш ва уни назорат қилишда умрбод ёндашув муҳим.
Шунингдек, 2022 йилда ЖССТ аъзо давлатлари 2030 йилгача бажарилиши керак бўлган 5 асосий мақсадни белгилаган:
— диабетлиларнинг 80 фоизини аниқлаш;
— қон шакарини барқарор назорат қилувчилар улушини 80 фоизга етказиш;
— қон босими назоратда бўлганлар сонини 80 фоизга чиқариш;
— 40 ёшдан ошган диабетлиларнинг камида 60 фоизи статин қабул қилиши;
— 1-тур диабетлиларнинг барчаси арзон инсулин ва ўз-ўзини назорат воситаларига эга бўлиши.
Мутахассислар бу рақамлар инсон саломатлиги учун жиддий сигнал эканини қайд этмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
