Австралия Сенати ўта ўнгчи сенатор Полин Хансонни парламентга бурқа кийиб киргани учун бир ҳафталик жазога тортиб, мандатини вақтинча чеклади. Reuters ёзишича, Хансон бурқани “ҳурматсиз ва номуносиб” тарзда таққан, бу эса парламент аъзолари томонидан қаттиқ танқид қилинган.
Маълум бўлишича, сенатор 24 ноябрь куни жамоат жойларида бурқа ва юзни тўсувчи бошқа кийимларни тақиқлашга қаратилган қонун лойиҳасини муҳокамага қўйишга рухсат ололмаганидан сўнг, норозилик сифатида юқори палатага бурқа кийиб кирган. Мусулмон қонун чиқарувчилар унинг бу ҳаракатини “ирқчилик ва ҳақорат” деб атади.
Австралия ташқи ишлар вазири Пенни Вонг сенаторнинг бу амалини кескин қоралаб, уни “ижтимоий бирдамликка зарба, эътиқодни масхара қилиш” деб баҳолади.
Полин Хансон илгари ҳам исломий кийимларга қарши чиқишлари билан танилган ва 2017 йили ҳам парламентга бурқа кийиб кириб, мамлакат бўйлаб бурқани тўлиқ тақиқлашни талаб қилган эди.
Хансон эса ўз позициясидан чекинмаслигини билдириб, парламентда кийим чеклови йўқлигини таъкидлади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
