“Euromonitor International” ҳисоботига кўра, Париж 2025 йилги дунёдаги энг яхши туристик йўналишлар рўйхатида биринчи ўринни эгаллади. Шаҳар 18 миллиондан ортиқ халқаро сайёҳни қабул қилиб, ривожланган инфратузилмаси, маданий муҳити ва барқарор ривожланиш ташаббуслари билан етакчиликни мустаҳкамлади. Нотр-Дам соборининг қайта очилиши ва ПСЖнинг Чемпионлар лигасидаги ғалабаси эса туристлар оқимига катта таъсир кўрсатди.
Рейтингдаги кучли бешлик ўзгармаган: Мадрид иккинчи, Токио учинчи, Рим тўртинчи ва Милан бешинчи ўринни эгаллади. Мадрид барқарорлик ва шаҳар инфратузилмасини янгилашдаги лойиҳалари билан алоҳида эътироф этилган, Токио эса йирик тадбирлар ва сервисларни модернизация қилиш ҳисобига ўз мавқеини сақлаб қолди. Рим ва Милан меҳмонхоналар сони, инфратузилма ва бизнес марказ сифатидаги ривожи билан ажралиб турди.
Кучли ўнталикда фақат битта Америка шаҳри — Нью-Йорк (6-ўрин). Амстердам 7-ўрин, Барселона 8-ўрин, Сингапур 9-ўринга кўтарилган. Сеул биринчи марта кучли ўнталикка кирди.
Шу билан бирга, Лондон 13-ўриндан 18-ўринга тушиб кетди. Сабаби — барқарорлик, хавфсизлик ва меҳмондўстлик бўйича паст кўрсаткичлар.
Сайёҳлар оқими бўйича етакчилар
Халқаро ташрифлар бўйича Бангкок дунёнинг энг оммабоп йўналиши бўлиб қолмоқда. Ҳатто 7 фоизлик камайишга қарамай, шаҳар инфратузилмаси ва рақамли хизматлари туфайли етакчиликни сақлаб қолди. Гонконг ва Лондон мос равишда 2 ва 3-ўринни эгаллади. Макао ва Истанбул кучли бешликка кирди, улардан кейин Дубай, Макка, Анталья, Париж ва Куала-Лумпур жойлашди.
Туризмда технологик ўсиш
Дубай рақамли хизматлар ва маркетинг билан устунликни сақлаётган бўлса, Орландо ички туризм ва янги парклар ҳисобига Нью-Йоркдан ошиб ўтди. Ҳисоботда Нью-Йоркнинг ақлли шаҳар технологияларини жорий этиши, Абу-Дабининг AIдан фойдаланиши, Бангкокда рақамли кириш карталари татбиқ этилиши қайд этилган.
Экспертларга кўра, шаҳарлар эндиликда “миқдор эмас, сифат” тамойилини асос қилиб, кўпроқ сарф-харажат қиладиган ва масъулиятли сайёҳларни жалб қилишга ўтаётгани кузатилмоқда.
Инфратузилма ва инвестициялар
Рим, Токио ва Парижда меҳмонхоналар сегменти тез ривожланмоқда, аэропортлар кенгайтирилмоқда. Батуми эса бир неча йилдан бери “Европанинг йил манзили” номини сақлаб келмоқда. Гониодаги Wyndham Grand каби улкан лойиҳалар Грузия туризмини янги босқичга олиб чиқмоқда.
Euromonitor вакили Надежда Попованинг таъкидлашича, “шаҳарлар инвестиция, инновация ва рақамли технологияларни жамлаган ҳолда янги босқичга қадам қўймоқда”.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
