Эронда ўтган йирик марафон мусобақаси кутилмаган тарзда жамоат муҳокамасининг марказига айланди. Киш оролидаги югуриш марафонида аёллардан айримлари ҳижобсиз иштирок этгани учун ташкилотчилар ҳибсга олинди. Бу ҳақда “Iran International” маълум қилди.
Марафонда 2 мингга яқин аёл ва 3 мингдан ортиқ эркак қатнашган. Айрим иштирокчи хотин-қизлар қизил футболкаларда югургани, аммо ҳижоб тақмагани мамлакатда кескин баҳсларга сабаб бўлди.
Жамиятнинг бир қисми бу ҳолатни аёлларнинг эркинликка бўлган талаби сифатида қўллаб-қувватлади. Улар бунни ҳукумат белгилаган кийиниш қоидаларига нисбатан очиқ эътироз деб ҳисобламоқда.
Бироқ расмийлар буни мутлақо йўл қўйиб бўлмайдиган ҳаракат дея баҳолади. Бунда фақат ҳижоб қоидалари бузилгани эмас, балки мусобақанинг ўтказилишининг ўзи ҳам “жамоат ахлоқига зид”, дея танқид қилинди.
Шундан сўнг суд идоралари марафон ташкилотчиларига нисбатан чора кўриб, уларни ҳибсга олди.
Ҳижоб масаласи Эронда охирги йилларда жамиятни икки қарама-қарши лагерга ажратиб қўйган асосий мавзулардан бири бўлиб қолмоқда. Қоидалар баъзан юмшатилса, баъзан яна қаттиқлашади.
Эслатиб ўтамиз, 2022 йилда бутун мамлакат бўйлаб бир неча ой давом этган норозиликлар айнан ҳижоб қоидаларини бузгани учун ҳибсга олинган Маҳса Аминининг вафотидан кейин бошланган эди. Унинг ўлими ҳануз жамият хотирасида яшаб келмоқда.
Протестлар куч билан тўхтатилганига қарамай, кўплаб эронлик аёллар бугун ҳам қоидаларга бўйсунмаётгани қайд этилмоқда. Бу эса ҳукуматнинг навбатдаги кескин реакцияларига сабаб бўлмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
