Қирғизистоннинг Талас вилоятида юз берган қайғули ҳодиса кўпчиликнинг эътиборини тортиб, ота-оналар учун яна бир бор огоҳлик қўнғироғига айланди. Вилоят ички ишлар бошқармаси хабар беришича, 2010 йилда туғилган 14 ёшли қиз ҳаммомда ҳалок бўлган.
Маълум қилинишича, фожеа 7 декабрь куни Боқай-Ота туманида жойлашган Қизил-Сай қишлоғида содир бўлган. Марҳум қиз амакисининг уйидаги ҳаммомдан ҳушсиз ҳолда топилган. Ҳодиса юз берган вақтда у якка ўзи бўлгани маълум қилинмоқда.
Тиббий маълумотларга кўра, вояга етмаган қиз тиббиёт муассасасига етказилган вақтда ҳаёт аломатлари кузатилмаган. Дастлабки тиббий текширувлар унинг ўлимига ис газидан заҳарланиш сабаб бўлганини кўрсатиб берди. Мутахассислар таъкидлашича, ис гази беэттиборлик ёки техник носозликлар туфайли ҳосил бўлиши мумкин.
Воқеа юзасидан Боқай-Ота туман ИИБга расмий хабар тушган ва ҳуқуқ-тартибот идоралари томонидан суриштирув ишлари бошлаб юборилган. Терговчилар ҳодиса ҳолатларини, ис гази қай тарзда юзага келганини ва бинода ҳаво айланишининг қай даражада бўлганини ўрганмоқда.
Мутахассислар ота-оналар ва аҳолини яна бир бор хавфсизлик чораларига қатъий риоя қилишга, ис гази хавфини жиддий қабул қилишга чақирмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
