Европа футболида катта шов-шувга сабаб бўлиши мумкин бўлган хабар тарқалди. Маълумотларга кўра, Саудия Арабистони валиаҳд шаҳзодаси Муҳаммад бин Салмон Испаниянинг машҳур “Барселона” клубини сотиб олиш ниятида.
Журналист Франсуа Галлардонинг ижтимоий тармоқларда билдиришича, валиаҳд шаҳзода каталонияликлар клуби учун 10 миллиард евро миқдорида улкан таклиф киритишни режалаштирмоқда. Бу ҳақда Oxu.Az нашри хабар тарқатган.
Бироқ, манбаларга кўра, “Барселона” раҳбарияти бундай олди-сотди битимига салбий муносабатда бўлиши ва уни тўхтатиб қолиши мумкин. Клуб ўз мустақиллигини сақлаб қолиш тарафдори экани таъкидланмоқда.
Шу билан бирга, Goal нашри Саудия Арабистони Давлат инвестиция жамғармаси клубни тўлиқ сотиб олиш эмас, балки унинг айрим тижорат бўлинмаларига сармоя киритиш вариантларини ҳам кўриб чиқаётганини ёзмоқда.
Эслатиб ўтиш жоиз, айни пайтда “Барселона”нинг умумий қарздорлиги 2,5 миллиард еврога яқинлашган. Шу сабабли клуб атрофидаги ҳар қандай йирик молиявий таклиф футбол оламида жиддий муҳокамаларга сабаб бўляпти.
Меҳмон гуруҳидаги фойдаланувчилар ушбу мақолага изоҳ қолдира олмайди.
