Қора денгизда юз бераётган экологик ҳалокат оқибатлари тобора оғирлашмоқда. Керч бўғозида ёнилғи мойи тўкилиши ортидан бир йил давомида 600 дан ортиқ дельфин ўлик ҳолда қирғоққа чиқиб қолди.
Делфа сув сутемизувчиларини қутқариш илмий-экологик маркази маълумотларига кўра, авариядан кейинги илк ойдаёқ дельфинлар ўлими кескин кўпайган. Мутахассислар бу ҳолат яқин бир неча йил давомида ҳам сақланиб қолиши мумкинлигини истисно қилмаяпти. Сабаб сифатида организмда токсинлар тўпланиши, турли касалликлар кўпайиши ва туғилиш даражасининг пасайиши кўрсатилмоқда.
Айни пайтда қирғоққа чиққан барча дельфинлар тўғридан-тўғри ёнилғи мойидан ҳалок бўлган, деб аниқ айтиш қийин. Бироқ ўлим ҳолатларининг октябрь–ноябрь ойларида ва қирғоққа чиқиш мавсумида ҳам юқори бўлгани экологларни жиддий ташвишга солмоқда.
Эслатиб ўтамиз, 2024 йил декабр ойида Керч бўғозида бўрон вақтида икки танкер ағдарилиб, минглаб тонна мазут денгизга тўкилган эди. Шу воқеадан кейин Қора денгиз экотизими жиддий зарар кўрди. Расмий маълумотларга кўра, ифлосланган айрим пляжлар фақат 2026 йилга бориб тикланиши мумкин.
Қисқаси, инсон хатоси табиат учун оғир нархга тушмоқда. Қора денгиздаги дельфинлар тақдири эса ҳали узоқ йиллар экологлар диққат марказида қолиши кутилмоқда.
Меҳмон гуруҳидаги фойдаланувчилар ушбу мақолага изоҳ қолдира олмайди.
