Буюк Британияда соғлом овқатланишни тарғиб қилиш йўлида жиддий қадам ташланди. Мамлакатда ёғ, туз ва шакар миқдори юқори бўлган озиқ-овқат маҳсулотларини реклама қилишни чекловчи янги қонун кучга кирди. Ушбу қарор, аввало, болалар орасида семизлик муаммосига қарши курашишга қаратилган.
Янги тартибга кўра, бундай маҳсулотлар телевидениеда соат 21:00 дан олдин реклама қилинмайди. Интернет платформаларида эса уларни тарғиб қилиш умуман тақиқланди. Ҳукумат расмийларининг таъкидлашича, бу чора “ота-оналарга тарихдаги энг соғлом болалар авлодини тарбиялашда ёрдам бериш” мақсадини кўзлайди.
Чекловлар шакар, туз ва ёғ миқдори юқори бўлган 13 тоифадаги маҳсулотларга тааллуқли. Улар орасида шакарли ичимликлар, чипс ва тузланган газаклар, печенье ва тайёр нонушталар, попкорн, шоколад, сақич, музқаймоқ, шакарли пишириқлар, пицца ҳамда музлатилган таомлар бор.
Шу билан бирга, “зарарли овқат” ишлаб чиқарувчиларга болалар кўрадиган вақтда ўз брендларини реклама қилишга рухсат қолдирилган. Бироқ рекламада бевосита ушбу маҳсулотларни кўрсатиш қатъиян ман этилади. Кўплаб компаниялар янги талабларга мослашишни аллақачон бошлаган.
Расмий статистикага кўра, Буюк Британияда бошланғич мактабга қабул қилинаётган болаларнинг 22 фоиздан ортиғи ортиқча вазнга эга. Мактабни тугатиш пайтига келиб эса бу кўрсаткич қарийб 36 фоизга етади. Шунингдек, 5–9 ёшли болаларда шифокорга мурожаат қилишнинг энг асосий сабабларидан бири тиш кариеси ҳисобланади.
Мутахассислар реклама болаларнинг овқат танлови ва овқатланиш одатларига бевосита таъсир кўрсатишини таъкидламоқда. Янги чекловлар йил сайин болалар истеъмол қиладиган калория миқдорини 7,2 миллиардга камайтириш ва семизликка чалинган болалар сонини 20 минг нафарга қисқартиришни мақсад қилган. Узоқ муддатда эса бу чоралар соғлиқни сақлаш харажатларини қарийб 2 миллиард фунт стерлингга тежаши кутилмоқда.
Эслатиб ўтиш жоиз, Буюк Британия 2018 йилдан буён “шакар солиғи”ни ҳам жорий этган. Унга кўра, шакар миқдори юқори бўлган алкоголсиз ичимликлар ишлаб чиқарувчилари қўшимча солиқ тўлайди. Бу ҳам аҳолини соғлом турмуш тарзига ундашга қаратилган чоралардан бири ҳисобланади.
“Zamin”ни Telegram'да ўқинг!
