Қозоғистонда диний-маърифий соҳада сунъий интеллектдан фойдаланиш бўйича янги ташаббус муҳокамага чиқди. Қозоғистон Мусулмонлари диний бошқармаси диний саволларга жавоб беришга мўлжалланган “Имом AI” номли мобил иловани ишлаб чиқиш ва жорий этишни режалаштираётганини маълум қилди.
Orda.kz нашрига кўра, Қозоғистон Олий муфтийси Наурйзбай ҳожи Таганули мазкур илова 2026 йилда ишга туширилиши кўзда тутилаётганини айтган. Таъкидланишича, “Имом AI” ишончли диний манбаларга таяниб, фойдаланувчилар мурожаатларига тезкор ва аниқ жавоб бериш имконини яратиши кутилмоқда.
Баёнотда келтирилишича, замонавий шароитда диний соҳада ҳам рақамли ечимларни йўлга қўйиш муҳим. Лойиҳа фуқароларга диний масалалар бўйича қулай ва ишончли маълумот олишни осонлаштириши, шу билан бирга имомлар ва руҳонийлар зиммасидаги кундалик юкламани ҳам енгиллаштириши мумкин.
Эслатиб ўтамиз, Қозоғистон Президенти Қосим-Жомарт Тоқаев Янги йил муносабати билан қилган мурожаатида 2026 йилни рақамлаштириш ва сунъий интеллект инфратузилмасини ривожлантириш йили деб эълон қилган эди. Президент фикрича, илғор технологияларни жорий этиш мамлакат салоҳиятини турли йўналишларда оширишга хизмат қилади.
Қайд этиш жоиз, аввалроқ Ўзбекистон Мусулмонлар идораси сунъий интеллектдан диний савол сўраш масаласига нисбатан ўз позициясини билдирган эди.
“Zamin”ни Telegram'да ўқинг!
