Туркиялик машҳур санъаткор Йилдиз Тилбе Ғазо секторида бошпанасиз қолганлар учун катта саховат намунасини кўрсатди. У Қуддусдаги кўнгиллилар ташкилотига 300 минг АҚШ доллари миқдорида хайрия қилиб, бу маблағ эвазига Ғазода иккита тўлиқ жиҳозланган чодир шаҳарчаси барпо этилиши режалаштирилган.
Тилбе томонидан тақдим этилган молиявий ёрдам ортидан вайрон қилинган ҳудудларда тозалаш ишлари ниҳоясига етказилди ва қурилиш жараёнлари бошлаб юборилди. Ушбу шаҳарчаларнинг Рамазон ойигача тайёр бўлиши мўлжалланмоқда.
Бундан ташқари, хонанданинг Ғазода яшаётган фаластинлик оилаларнинг озиқ-овқат муаммоларини енгиллаштириш мақсадида хайрия концерти бериши ҳам режалаштирилган.
Йилдиз Тилбе бу ҳақда шундай дейди:
“Ҳаммаси Аллоҳ розилиги учун. Қўлимдан келганича ёрдамни давом эттираман.”
Маълумотларга кўра, хонанда ажратган 300 минг доллар — унинг умумий молиявий ҳолатининг ярмига тенг. Бу эса Тилбенинг холис ва чин юракдан қилган ёрдамини янада таъсирли қилади.
“Zamin”ни Telegram'да ўқинг!
