Италиянинг Торре Лапилло шаҳрида 57 ёшли эркак умр бўйи йиғиб келган бойлигини бир лаҳзада йўқотиб қўяёзди. Гап шундаки, у 20 та олтин қуймани билмасдан чиқинди билан бирга ташлаб юборган.
Маълум бўлишича, қиймати 120 минг евро атрофида баҳоланган қуймалар тунука қутида сақланган. Эркак хонадондаги чиқиндиларни ташлар экан, айнан шу қутини ҳам бакка улоқтириб юборган. Энг оғири — буни эртаси кунигина англаб етган.
Шундан сўнг у дарҳол полицияга мурожаат қилган. Дастлаб ходимлар бу гапга унчалик ишонмаган, аммо кузатув камералари ёзувлари текширилгач, воқеа рост экани тасдиқланган.
Текширув давомида чиқиндилар аллақачон қўшни Угенто шаҳридаги чиқиндихонага олиб кетилгани аниқланган. Ҳуқуқни муҳофаза қилувчи органлар у ерда қидирув ташкил қилиб, ниҳоят олтин қуймалар солинган қутини топишга муваффақ бўлган.
Қизиғи, бунга ўхшаш ҳолат яқинда Таиландда ҳам кузатилган: 2025 йил ноябрда бир аёл тахминан 62 минг долларлик учта олтин қуймани чиқиндига ташлаб юборгани айтилган. Унинг ўғли қуймаларни қайтарганларга мукофот ваъда қилган, аёл эса деменциядан азият чекиши қайд этилган.
“Zamin”ни Telegram'да ўқинг!
