Австралиялик тадбиркор Пол Кунингҳам ЧатГПТ'ни ҳам ўз ичига олган сунъий интеллект воситалари ёрдамида ўз ити Рози учун шахсийлаштирилган саратонга қарши вакцина ишлаб чиқди. Бу ҳолат ит учун индивидуаллаштирилган mRNA саратон вакцинасини яратишга қилинган маълум бўлган илк уриниш сифатида таърифланмоқда. Бу ҳақда Rozetked.me хабар беради.
Рози касалликни тўхтата олмаган стандарт даволаш усулларидан сўнг тери саратонининг тажовузкор турига чалингани аниқланган. Кунингҳам унинг ДНКсини геном таҳлили учун юборди ва кейин AI воситаларидан фойдаланиб генетик маълумотларни ўрганди ҳамда ўсмаларга боғлиқ мутацияларни аниқлади.
У, шунингдек, бу мутациялар оқсилларга қандай таъсир қилганини текшириш ва эҳтимолий терапия нишонларини излаш учун АлпҳаФолд'дан фойдаланди. Шундан сўнг натижалар Австралиядаги UNSW RNA институтига юборилди, у ерда тадқиқотчилар Рози учун махсус mRNA вакцина ишлаб чиқишди.
Ит иммунотерапия олганидан кейин, хабарларга кўра, унинг энг йирик ўсмаларидан бири деярли ярмига қисқарган. Унинг умумий аҳволи ҳам яхшиланган, олимлар эса энди қолган ўсмаларга қаратилган даволашнинг иккинчи вариантини тайёрламоқда.
Тадқиқотчилар айтишича, бу тажриба келажакда ҳайвонлар ва одамларда саратонни даволашнинг янги усулларига йўл кўрсатиши мумкин. Ёндашув ҳали ҳам ниҳоятда тажрибавий бўлса-да, дастлабки натижа AI шахсийлаштирилган тиббиётни яратишни қандай тезлаштириши мумкинлигига эътиборни тортди.
“Zamin”ни Telegram'да ўқинг!
