Буюк Британия Қироли Чарлз III 19 йиллик танаффусдан сўнг расмий ташриф билан АҚШга борди. Кеча, 27 апрель куни у рафиқаси Қиролича Камилла билан бирга Вашингтонга етиб келган. Уларни Доналд Трамп ва АҚШнинг биринчи хоними Мелания Трамп Оқ уйда тантанали тарзда кутиб олган.
Бу ташриф Британия монархининг АҚШга 2007 йилдан бери илк расмий сафари ҳисобланади. Ташрифнинг дастлабки кунлари дипломатик учрашувлар ва расмий маросимлар билан бошланди.
Бугун, 28 апрель куни Чарлз III АҚШ Конгрессининг ҳар икки палатаси олдида нутқ сўзлаши режалаштирилган. Бу воқеа тарихий аҳамиятга эга бўлиб, Британия монархининг АҚШ парламентида иккинчи марта чиқиши сифатида қайд этилади. Аввалроқ, 1991 йилда қиролича Элизабет II Конгрессда нутқ сўзлаган эди.
Ташриф дастури давомида қирол ва қиролича Нью-Йорк шаҳрига ҳам йўл олишади. У ерда улар 2001 йил 11 сентябрь терактлари қурбонларининг хотирасига бағишланган маросимда иштирок этиши кутилмоқда.
Мазкур ташриф айни пайтда АҚШ ва Буюк Британия ўртасидаги сиёсий муносабатлар мураккаб даврни бошдан кечираётган бир пайтга тўғри келмоқда. Хусусан, Доналд Трампнинг Европага нисбатан ташқи сиёсати бу муносабатларга таъсир кўрсатмоқда, деб баҳоланмоқда.
Шунга қарамай, АҚШ Президенти қиролнинг ташрифи икки давлат ўртасидаги ҳамкорликни янада мустаҳкамлашига ишонч билдирган.
