Эрон расмийлари узоқ вақтдан бери муҳокамалар марказида бўлиб келаётган масалага аниқлик киритди. Мамлакатдаги нуфузли шахслардан бири — Мужтабо Хоманаийнинг соғлиғи билан боғлиқ ҳолат юзасидан илк бор батафсил маълумот тақдим этилди.
Al Arabiya хабар беришича, 28 феврал куни содир бўлган ҳаво ҳужуми чоғида Мужтабо Хоманаий зарба тўлқини таъсирида мувозанатини йўқотиб, ерга йиқилган. Оқибатда у тизза ва бел қисмида жароҳат олган. Шунингдек, қулоқ орқасида енгил кесма қайд этилгани ҳам маълум қилинди.
Расмий манбаларга кўра, унинг бел қисмидаги жароҳат деярли тўлиқ тузалган. Тиззадаги шикаст эса ҳали даволаниш жараёнида бўлиб, тез орада тўлиқ соғайиши кутилмоқда. Қулоқ орқасидаги енгил жароҳат эса жиддий эмас ва ташқи кўринишда деярли сезилмайди.
Олий раҳбар девони вакиллари Мужтабо Хоманаийнинг умумий аҳволи барқарор эканини, у давлат ишларини кузатиш ва муҳим жараёнларда иштирок этишда давом этаётганини таъкидлади. Улар турли миш-миш ва тахминларга ўрин қолдирмасликка чақирди.
Шу билан бирга, АҚШ томонидан билдирилган фикрлар вазиятга янада қизиқиш уйғотди. Жумладан, Пит Ҳегсет Мужтабо Хоманаийнинг ташқи қиёфасида ўзгариш бўлган бўлиши мумкинлигини айтган. Унинг бу фикри сўнгги вақтларда Мужтабонинг омма олдида кўринмаётгани билан изоҳланган.
Бундан ташқари, Доналд Трамп ҳам унинг тириклиги ҳақидаги саволларга аниқ жавоб бермаган ҳолда, турли эҳтимолларни истисно этмаганини билдирган.
Бироқ расмий Теҳрон бу каби даъволарни қатъий рад этиб, Мужтабо Хоманаийнинг соғлиғи юзасидан хавотирга ҳеч қандай асос йўқлигини таъкидламоқда. Эрон томонига кўра, тарқатилаётган айрим хабарлар асоссиз бўлиб, воқеликка тўғри келмайди.
Мазкур ҳолат атрофидаги қарама-қарши баёнотлар эса халқаро майдондаги ахборот уруши ва сиёсий зиддиятлар қанчалик кучли эканини яна бир бор кўрсатмоқда.
“Zamin”ни Telegram'да ўқинг!
