Ироқда нефть вазири ўринбосарининг уйидан 200 минг доллар ва 4 кг тилла чиқди

Ироқда давом этаётган йирик аксилкоррупция иши доирасида нефть вазири ўринбосари Аднан ал-Жамилийнинг уйида тинтув ўтказилди. Тинтув вақтида нақд пул, тилла ва бошқа қимматбаҳо буюмлар топилган.

Маълум қилинишича, хонадондан 25 миллион Ироқ динори, 200 минг АҚШ доллари, 4 килограмм тилла ва турли тақинчоқлар мусодара қилинган.

Тергов версиясига кўра, ал-Жамилий давлат маблағларини жуда катта миқдорда ўзлаштириш схемасини ташкил этган бўлиши мумкин. У бир нечта юқори лавозимли шахслар манфаати учун воситачилик қилганликда ҳам айбланмоқда.

Бу иш бўйича аввал ҳам катта миқдорда бойлик мусодара қилинган. Тергов давомида ал-Жамилий ва унинг шериклари уйларидан 107 миллион доллар ва 375 килограмм олтин олингани айтилган.

Ҳозирда мазкур коррупция иши бўйича суриштирув ва тергов ҳаракатлари давом этмоқда.