Трампга тақлид қилиб ҳаракатларини такрорлаган эркак интернет юлдузига айланди (видео)

АҚШ президенти Дональд Трампнинг 22 июль куни Жоржия штатидаги Мариетта шаҳрида ўтказган чиқиши вақтида кутилмаган ҳолат юз берди. Саҳна ортида ўтирган эркак Трампнинг қўл ҳаракатлари, юз ифодалари ва гапириш пайтидаги имо-ишораларини деярли бир хил тарзда такрорлай бошлади.

Эркакнинг ҳаракатлари жонли эфирни тасвирга олаётган камералар эътиборидан четда қолмади. Кадрларда у Трамп қўлини кўтариши билан қўлини кўтаргани, президентнинг юз ифодаларини эса бир неча сония ичида такрорлагани кўринади.

Видео ижтимоий тармоқларга жойланганидан кейин қисқа вақт ичида кенг тарқалди. Фойдаланувчилар уни "иккинчи Трамп" деб атаб, турли ҳазиллар ва мемлар тайёрлай бошлади.

Натижада оддий томошабин сифатида тадбирда қатнашган эркак биргина видео орқали интернетда танилиб, тармоқ юлдузига айланди.