Икки ҳафтада 18 кишига ташланган маймун ушланди

Индонезиянинг Суматра оролида икки ҳафта давомида аҳолига тасодифий равишда ҳужум қилиб, 18 кишини яралаган маймун тутиб олинди. Ҳодисалар Тэмбилахан шаҳрида содир бўлиб, хавф туфайли ўнлаб мактаблар вақтинча ёпилди.

Маълум қилинишича, катта ёшли узун думли макак маймуни одамларни тишлаб ва тирнаб, асосан ёлғиз юрган пайтларида ҳужум қилган. Жабрланганлар орасида болалар ва кексалар ҳам бор. Тэмбилахан ёнғин ва қутқарув хизмати раҳбари Жунаиди Исмаилнинг айтишича, жами 19 та ҳужум қайд этилган ва 18 киши жабрланган. Улардан бири икки марта ҳужумга учраган. Айрим жабрланганларга ўндан ортиқ чок қўйишга тўғри келган, шунингдек, уларга қутуришга қарши эмлашлар қилинган.

Маймун шаҳарга ўрнатилган махсус тузоқ ёрдамида қўлга олинди. Қутқарув хизмати тарқатган видеода уни тирик ҳолда, бироз безовта кўринишда қафас ичида турганини кўриш мумкин.

Шаҳар расмийси Ари Сюрия аҳолини ҳали ҳам эҳтиёткор бўлишга чақирди. Унинг таъкидлашича, маймун бошқа маймунлар билан бирга ҳаракат қилган бўлиши мумкин. Шу сабабли бошқа ҳайвонлар ҳам одамларга ҳужум қилиши эҳтимоли истисно этилмаяпти.

Ҳодиса сабабли 40 та мактаб фаолиятини ҳали давом эттирмади. Тэмбилахандаги юзлаб ўқувчилар учун уч кунлик онлайн таълим жорий қилинди. Агар вазият хавфсиз деб топилса, мактаблар тезроқ қайта очилиши режалаштирилган.

Қўлга олинган маймун Суматра оролидаги Риау вилояти пойтахти Пеканбаруга олиб кетилди. У ерда табиатни муҳофаза қилиш агентлиги ҳайвондан қон олиб, турли кузатув ва текширувларни ўтказади. Мутахассислар маймун бирор касаллик ташувчиси ёки ташувчиси эмаслигини аниқлашни режалаштирмоқда.

Мутахассисларнинг таъкидлашича, Жануби-Шарқий Осиёнинг кенг архипелагида инсонлар ва ёввойи ҳайвонлар ўртасидаги можаролар тез-тез учрайди. Айниқса, пальма мойи плантацияларини кенгайтириш учун тропик ўрмонларнинг кесилиши маймун, фил ва йўлбарс каби ҳайвонларнинг табиий яшаш ҳудудлари қисқаришига олиб келмоқда.