Трамп Пенсилванияда овоз бериш натижалари ўзгартирилганини айтди

^{Фото: AFP}
АҚШ президенти Дональд Трамп Пенсилвания штатида президент сайловидаги овоз бериш натижалари ноқонуний равишда ўзгартирилган деб ҳисобламоқда. У бу ҳақда ўзининг твиттер саҳифасида маълум қилди.

«Сайлов куни, сешанба кеч соат саккиздан кейин ўн минглаб овозлар ноқонуний тарзда олинди, бу Пенсилвания ва бошқа айрим штатларда натижаларни бутунлай ва осонгина ўзгартирди», — деб ёзди Трамп.

Шунингдек, Трампнинг қайд этишича, кузатувчиларнинг қатор штатларда сайлов участкаларига қўйилмаганлиги сабабли унинг овоз олиш борасидаги етакчилиги йўққа чиққан.

3 ноябрь куни АҚШда навбатдаги президентлик сайлови ўтказилди. Унда амалдаги президент республикачи Дональд Трамп ва собиқ вице-президент Жо Байден ўзаро рақобат олиб борди. Сайловда Байден ғалаба қозониши тобора ҳақиқатга яқин бўлиб бормоқда, чунки у яхшигина устунликка эга.

Дональд Трамп сайлов нохолис ўтказилганлигини иддао қилиб келмоқда. Трамп жамоаси айрим штатларда овозларни қайта ҳисоблашни талаб қилмоқчи, айрим штатларда эса судга мурожаат қилиниши мумкин. “Замин” янгиликларини “Twitter”да кузатиб боринг