Кардиолог огоҳлантирди: Нонуштада ширинлик – саломатликка хиёнат!

Тонгда конфет, печенье ёки бошқа ширин маҳсулотлар билан нонушта қилиш кўпчилик учун одатий ҳолатга айланган. Аммо Испаниялик таниқли кардиолог, доктор Хосе Абелян бу борада жиддий огоҳлантирув берди. Унинг La Razon нашрига берган интервьюсида таъкидлашича, бундай ширин нонушта нафақат саломатлик учун зарарли, балки бутун кун давомидаги энергия, кайфият ва метаболик фаолликни издан чиқариши мумкин.

Абелянга кўра, инсон организми тонгги овқат орқали "метаболик тон"ни ўрнатади. Яъни, нонушта нафақат тўйиш эҳтиёжини қондириши, балки бутун организмни кунига тайёрлашда муҳим вазифа ўтайди. Агар нонушта таркибида асосан ширин маҳсулотлар — конфет, торт, донли печенье бўлса, бу иштаҳани назоратсиз кўпайтириб, ортиқча калория олишга, ҳатто кун давомида қайта-қайта овқат ейишга олиб келади.

“Ширин маҳсулотлар асосан қайта ишланган, таркибида фойдали микроэлементлар – витамин, минерал, оқсил, мураккаб углеводлар деярли йўқ”, – дея таъкидлайди кардиолог.

Унинг фикрича, нонуштадан сўнг қонда глюкоза миқдори кескин ошади, бу эса ортиқча вазн, инсулин қаршилиги, иммунитетнинг сусайиши ва юрак-қон томир касалликлари хавфини сезиларли даражада оширади.

Шунингдек, доктор Абелян ширинликларни бутунлай рад этишга чақирмайди. У улардан тўғри ва меъёрда фойдаланиш тарафдори:

“Масала конфет емасликда эмас, балки тўлиқ ва фойдали нонуштани ширинликка алмаштиришда. Агар инсон ширинни вақти-вақти билан ейдиган бўлса – бундан ҳеч қандай зарар йўқ. Аммо бу ҳар куни эрталаб нонушта ўрнида бўлса – хавфли одатга айланади”, – дея огоҳлантиради у.

Мутахассислар нонуштада оқсил, соғлом ёғлар ва мураккаб углеводларга бой овқатларни — масалан, тухум, авокадо, гречка, сабзавотлар ёки гўштли сэндвичлар каби фойдали альтернативаларига устуворлик беришни тавсия этмоқда.

Шундай экан, тонгдаги илк овқат танлови — фақат овқатланиш эмас, балки саломатлик, ҳаёт тарзи ва келажакдаги касалликлардан сақланишнинг дастлабки қадами эканини унутманг. «Замин»ни Telegram’да ўқинг!