Кечирмаслик ҳимоя эмас, ўзингизга ўзингиз берган жазодир!

Ичингизни кемираётган оғриқни ушлаб туриш — ғалаба эмас. Бу ҳаётда олдинга юриш эмас, балки оғриқ билан яшашни танлашдир. Кечирмасликни “ўзимни ҳимоя қилаяпман” деб баҳолашингиз мумкин. Чунки сизга зарар етказган инсонга ишончсизлик қилиш табиий. Лекин шу орқали айнан ўзингизни эркинликдан маҳрум қилаётганингизни ҳис қилиш осон эмас.

Бу оғриқ сизга етишмаётган адолат ҳисси, ҳимояга муҳтож қалбингиз, ёки юракдаги ҳақорат сабабли пайдо бўлган. Ва сиз уни кетказмасдан сақлаб турасиз. Аммо шу билан бирга, уни тан олиб, фақат кечириш орқали ечимга олиб келиши мумкинлигини англаш ҳам муҳим.

Кечириш – нимадандир воз кечиш эмас. Бу кимнидир оқлаш ҳам эмас. У сизга оғриқ етказган инсон “тўғри йўлда бўлган” дегани эмас. Кечириш, биринчи навбатда, ўзингизга энг катта совға — тинчликни бериш демакдир.

Келинг, кечириш ҳақидаги кенг тарқалган нотўғри тушунчаларни кўриб чиқайлик:

1. Кечириш уни “ҳақ” деб қабул қилиш эмас. Сиз кимнидир кечирганингиз – у қилган ишини тўғри деб қабул қилдингиз дегани эмас. Сиз адолатсизликни қабул қилмаяпсиз, сиз оғриқни ичингизда сақламасликни танлаяпсиз.

2. Кечириш унга эмас, сизга совға. У инсон ўз йўлида кетаверади. Аммо кечирмаслик сизнинг юрагиингизда оғриқ ва ғазабни сақлаб қолади. Шу оғриқ билан уйғониш, тунда ухлай олмаслик, ҳаётга ишончсиз қараш — буларнинг барчаси ўзингизга зарар.

3. Кечириш кучсизлик эмас. Аксинча, бу жуда катта ички кучни талаб қилади. Кучсиз инсон ғазабдан қутула олмайди. Кучли одам эса оғриқни тан олиб, уни қабул қилади ва кетказади.

4. Кечириш — бу блокларни ечиш. Руҳиятимизда тўпланган ҳар бир эътироз, ҳар бир юракда қолган алам — бу ички блоклардир. Улар ҳаётингизни тўғри йўналишда олиб боришга тўсқинлик қилади.

Назарни ўзгартириш — кечиришнинг биринчи ва муҳим қадами. Агар вазиятга “менга нимани ўргатди?”, “мен бу орқали нимани англадим?” деган нуқтаи назардан қарасангиз, кечириш осонлашади.

Шу билан бирга, кечириш сизга иккинчи имкониятни ҳам олиб келади. У сизни енгиллик сари олиб боради. У ўзингизни эркин, тоза, енгил ҳис қилишингиз учун эшик очади.

Хулоса қилиб айтганда, кечирмаслик билан яшаш — бу ўтмишда қул бўлиб қолиш демакдир. Кечириш эса эркинликни танлашдир. Ва бу танлов ҳар куни, ҳар дақиқа, ҳар бир ҳисда қайтариладиган жараён. Агар кечира олсангиз — сиз янгидан нафас олган, қалбингизда бағрикенглик уруғини эккан инсонсиз. «Замин»ни Telegram’да ўқинг!