Олимлар олиб борган янги тадқиқот натижалари мусиқа тинглаш инсонда ёлғизликни енгиллаштириши ва ижобий ижтимоий тасаввурларни уйғотишини кўрсатди. Бу ҳақида Pravilamag нашри ёзмоқда.
COVID-19 пандемияси даврида қўшиқлар инсон ҳаётида мулоқот ўрнини қисман тўлдириши мумкинлиги ҳақидаги фикр кенг тарқалган эди. Ўша пайтда кўплаб одамлар мусиқани “ҳамроҳ” сифатида тинглаганини ва у орқали ёлғизлик ҳиссини камайтирганини билдирган.
Сидней Мусиқа консерваторияси ҳузуридаги "Мусиқа, онг ва тана" лабораторияси раҳбари, Ҳоризон дастури тадқиқотчиси Стеффен А. Херфф бошчилигида ўтказилган янги илмий ишда мусиқанинг ижтимоий мавзулар билан боғлиқ фантазияларни кучайтириши аниқланди. Унинг таъкидлашича:
— “Одамлар мусиқани кўпинча ўзларига ҳамроҳ бўлиши учун тинглашларини айтишган. Лекин бу шунчаки ифодавий гапми ёки мусиқанинг ижтимоий тафаккурга ҳақиқий таъсири борми — шу пайтгача аниқ бўлмаган эди”.
Тадқиқотда 600 нафар кўнгилли қатнашди. Улар ёлғиз қолган одам ҳақидаги видеони томоша қилиб, ҳикояни давом эттиришлари керак эди. Иштирокчиларнинг бир қисмига турли тиллардаги қўшиқлар ёки инструментал мусиқа тинглаш таклиф этилди, қолганлари эса сукутда ўз тасаввурларини яратди.
Натижалар шуни кўрсатдики, мусиқа тинглаганлар сукутдагиларга қараганда анча ёрқин, илиқ ва ижобий фантазиялар яратган. Уларнинг ҳикояларида “халқ”, “дўст”, “бирга”, “қишлоқ” каби ижтимоий мазмундаги тушунчалар тез-тез учради.
Херффнинг қўшимча қилишича, қўшиқ матнини тушунмаслик ҳам бу жараёнга тўсқинлик қилмайди. Ҳатто мусиқада сўзлар бўлмаса ҳам, у ижтимоий хаёлотни фаоллаштира олади. Демак, бу жараён фақат инсон овозини эшитиш билан боғлиқ эмас.
«Замин»ни Telegram’да ўқинг!
