Ўзбекистонда кўпчилик оилаларнинг даромади асосан кундалик эҳтиёжларга сарфланади, жамғарма қилиш имконияти эса чекланган. Шу сабабли 500–1000 доллар тўплаган киши “қайси йўналишга инвестиция қилсам?” деган саволга дуч келади.
Биринчи навбатда қуйидагилар муҳим:
Фавқулодда жамғарма (молиявий ёстиқча) – иш тўхтаса, камида 3–6 ойлик ҳаётни таъминлайдиган маблағ сақлаб қўйиш керак. Бу пул нақд ёки олтин кўринишида бўлиши мумкин.
Ўзингизга инвестиция қилинг – қўшимча маблағни дарров молия бозорига сарфлашга шошилманг. Бу босқичда энг фойдали сармоя – касбий малака ошириш курслари, халқаро сертификатлар, хорижий тил ўрганиш ва шахсий ривожланишдир.
Молиявий саводхонликни ошириш – нафсга берилмаслик, кераксиз кредитлардан узоқ туриш ва пул бошқаришни ўрганиш келажакда катта имкониятлар яратади.
Саломатлик ва кўникмалар – руҳий, жисмоний соғликка ғамхўрлик қилиш, мулоқот ва шахсий бренд тузиш каби кўникмалар ҳам энг муҳим инвестиция турларидандир.
Кичик маблағ билан ҳам инвестиция қилиш мумкин, лекин унинг энг тўғри йўли – аввал ўзингизни ривожлантириш ва хавфсизлик жамғармаси яратишдан бошланади.
«Замин»ни Telegram’да ўқинг!
