Олимлар ва шифокорлар саломатликни тиклашнинг энг арзон ва ёқимли усулини маълум қилишди.
Тиббиёт олами вакиллари инсонларга ҳафтада камида беш маротаба чин дилдан, мириқиб кулишни маслаҳат бермоқдалар. Бу шунчаки кайфиятни кўтариш эмас, балки тананинг ички аъзолари учун ўзига хос «табиий дори» вазифасини ўтайди.
Пенсильвания университети профессори, кардиолог Майкл Миллернинг таъкидлашича, кулиш жараёнида мияда эндорфин гормонлари фаол ишлаб чиқарилади. Ушбу моддалар қон томирларида фойдали кимёвий жараёнларни бошлаб беради. Натижада:
- Юрак фаолияти яхшиланади;
- Иммунитет тизими мустаҳкамланади;
- Кучли стресс ва асабийлик ҳолатлари чекинади.
Психолог Уильям Фрай кулгининг кучини исботлаш учун ўзига хос тажриба ўтказди. У машҳур комедик фильмларни томоша қилаётган вақтда ўзидан қон намуналарини олди. Натижалар эса ҳайратланарли: қувноқ кайфият ва кулги пайтида инсон қонида касалликларга қарши курашувчи ҳимоя ҳужайралари сони кескин ортган.
Хулоса шундаки, шифокорлар тавсиясига амал қилиб, тез-тез кулгили кўрсатувлар кўриш ёки яқинлар даврасида ҳазил-ҳузул қилиш — узоқ умр кўришнинг гаровидир.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
