Янги йил кириб келар экан, кўпчилик курантлар садоси остида яна бир бор орзу-истакларини қоғозга ёзиб, ёқиб, кулини қадаҳга солиб ичади. Умид битта: янги йилда ҳаёт ўзгаради, орзулар рўёбга чиқади. Аммо амалда нима бўляпти? Энг яхши ҳолатда — ҳеч қандай ўзгариш йўқ, энг ёмон сценарийда эса соғлиқ билан боғлиқ муаммолар.
Муаммо маросимда эмас. Муаммо — фикрлаш тарзимизда.
Кўплар ўйлайди: истакни “тўғри” ифодалаш керак, “хоҳлайман” демаслик, махсус сўзлар билан айтиш лозим. Аслида эса бунинг ҳеч қандай аҳамияти йўқ. Қандай сўз ишлатганингиз натижани белгилаб бермайди.
Асосий масала — истакнинг ўзи эмас, унинг ортида турган ички ҳолат.
Орзу қилишни тўхтатиб, аввало муаммони аниқлаш керак. Масалан:
— шахсий ҳаётим изга тушмаяпти;
— орзу қилган уй учун маблағим йўқ;
— даромадим керакли даражага етмаяпти.
Бу нима учун муҳим? Чунки айнан шу муаммони ҳал қилишга тўсқинлик қилаётган ички психологик механизмни аниқлаш мумкин бўлади.
Кўпинча болаликдаёқ бизда хавфли боғланиш шаклланади. Сиз бир пайтлар жуда қаттиқ ниманидир хоҳлагансиз — ўйинчоқ, саёҳат, совға. Аммо уни олмагансиз. Шу лаҳзада истак ҳисси умидсизлик билан боғланиб қолган. Мияда “хоҳлаш = кўнгил қолиш” деган автоматик дастур ишга тушган.
Йиллар ўтди, сиз катта бўлдингиз, лекин бу нейрон боғланиш сақланиб қолди. Энди ҳар сафар орзу қилганингизда, мия нафақат истакни, балки у билан боғлиқ нохуш ҳисни ҳам фаоллаштиради. Натижада ҳаракат сустлашади, қарорлар кечикади, имкониятлар кўринмай қолади. Ва яна “орзулар амалга ошмади” деган хулосага келинади.
Шунинг учун ечим — Коинотдан сўраш ёки сеҳрли сўзлар эмас. Ечим — истак ва умидсизлик ўртасидаги боғлиқликни узиш.
Истакни қувонч, ишонч ва қониқиш ҳисси билан боғлаш керак. Ана шунда мия янги сценарийни ишга туширади. Унинг ўзи ечимларни қидира бошлайди, имкониятларни кўради, ҳаракатга туртки беради. Чунки ҳаётимизда содир бўлаётган асосий ўзгаришларни айнан мия бошқаради, янги йил “мўъжизалари” ҳам шундан бошланади.
Хулоса оддий:
— орзулар учун маросим шарт эмас;
— керакли ресурслар сизда аллақачон бор;
— асосийси — мияни тўғри йўналтиришни ўрганиш.
Янги йилда орзу қилишдан қўрқманг. Фақат бу сафар уни онгли равишда, тўғри асосда бошланг.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
