Сочларнинг узун ва қалин бўлишига ҳисса қўшадиган фойдали маҳсулотлар

Сочлар мустаҳкам бўлиши учун қандай маҳсулотларни истеъмол қилиш кераклиги ҳақида Cosmopolitan нашри маълумот бериб ўтади.

Сочлар учун фойдали бўлган компонентлар
Сочлар мустаҳкам бўлиши учун рационда ёғ кислоталари, оқсил ва витамин бисёр бўлиши керак. Қуйидаги озуқа моддалари, айниқса, энг муҳими ҳисобланади:

биотин – сочларни ўстиради;
D витамини – соч фоликулалари учун фойдали;
E витамини – соч тўкилишининг олдини олади;
темир моддаси – алопециянинг олдини олади;
C витамини – темир моддасининг сингиши учун ёрдам беради;
омега-3 ёғ кислотаси – яллиғланишга қарши ёрдам беради.

Сочлар саломатлиги учун муҳим бўлган маҳсулотлар
Рационга эътиборли бўлиб, қуйидаги маҳсулотларни унга киритишга ҳаракат қилинг.

Мандарин
Мандарин ва бошқа цитрус мевалар C витаминининг кони экани ҳисобига темир моддасининг яхшироқ сингишига ёрдам беради.

Лосос
Денгиз балиғида организм, хусусан, сочлар саломатлиги учун муҳим бўлган омега-3 ёғ кислотаси сероб бўлади. Ушбу кислота яллиғланишга қарши курашиб, соч тўкилишининг олдини олади, шунингдек, ўсишини жадаллаштиради. Жилокор ва ялтироқ бўлишига ҳисса қўшади.

Исмалоқ
Исмалоқ темир моддаси, магний ва соч тўкилишининг олдини оладиган микроэлементларнинг кони ҳисобланади.

Тухум
Тухумда А ва Д витаминидан ташқари, антиоксидантлардан, каротиноидлар ҳам мўл бўлади. Қолаверса, тухум соч ва тирноқлар учун муҳим бўлган биотинни ҳам ўз ичига олади.

Йогурт
Шакар ва қўшимчаларсиз оддий йогурт соч ва тирноқларнинг ўсиши учун муҳим бўлган оқсил, тери ва сочлар ҳолати учун аҳамиятли бўлган B гуруҳи витаминларини ўз ичига олади.

Сули ёрмаси
Сули ёрмаси клетчатка, омега-3 ёғ кислотаси, рух ва бошқа бирикмаларнинг ҳам кони.

Дуккакли маҳсулотлар
Ясмиқ, нўхат ва ловия таркибида қон ҳужайраларининг ҳосил бўлишида муҳим бўлган фолий кислотаси мавжуд.

Жигар
Жигарда ҳам исмалоқ сингари темир моддаси, сочларнинг гўзаллиги учун аҳамиятли бўлган B гуруҳи витаминлари бисёр.

Ёнғоқ
Грек ёнғоғида соч тўкилишининг олдини олиб, ўсишини жадаллаштирадиган фойдали ёғлар кўп миқдорда бўлади.

Сабзи
Ушбу маҳсулот организмда А витаминига айланадиган бета-каротинни ўз ичига олади. Унинг танқислигида сочлар ингичка ва қуруқ бўлиб қолади. Уни доимий равишда истеъмол қилиш саломатликка фойда бериши аниқ.

Киви
Кивида ҳам темирнинг сингиши учун муҳим бўлган C витамини мавжуд.

Қизил булғори қалампири
Қизил булғори қалампири C витаминининг кунлик меъёрини ўз ичига олади. Шунингдек, унда яллиғланишга қарши самара берадиган антиоксидантлар мужассам. “Замин” янгиликларини “Telegram”да кузатиб боринг