Ҳомиладор аёллар сочларини бўяши мумкинми?

^{Фото: Pinterest}
Одатда бўлажак оналар орасида сочни бошқа рангга бўяш борасида саволлар туғилади. Аслида фарзанд кутаётган аёл сочларига бўёқ билан ўзгартириш киритиши мумкинми? Ушбу саволга Lifehacker нашри жавоб берди.

Сочни бўяш ҳомилага зарар етказиши мумкинми?

Бўёқ танага кирмасдан, фақат соч ва терига таъсир қилганлиги сабабли процедура зарар қилмайди. Шунга қарамай, кўплаб шифокорлар ҳомиладорликнинг иккинчи триместрига қадар гўзаллик салонига ташрифни кечиктиришни маслаҳат беради.

Ҳақиқат шундаки, дастлабки ойларда кўплаб аёллар ўткир ҳидларга сезгир бўлади, шунинг учун ушбу жараён кўнгил айниши ва бош оғриғига олиб келиши мумкин. Ҳомиланинг 13-ҳафтасидан сўнг сочга ранг бериш учун ишончли мутахассисга мурожаат қилиш ёки буни уй шароитида амалга ошириш мумкин.

Ранг билан боғлиқ муаммолардан қандай қочиш керак?

Одатга кўра, синовдан ўтган бўёқдан фойдаланиш тавсия этилади. Чунки баъзи бирикмалар аллергияга олиб келиши мумкин, шунинг учун тажрибаларни кечиктириш ва тасдиқланган маҳсулотлардан фойдаланган яхшироқ. Агар ҳомиладор аёлда экзема ёки псориаз касаллиги каби тери муаммолари бўлса, бўяшдан олдин дерматолог билан маслаҳатлашиш керак.

Вентиляцияни текширинг. Ҳомиладорлик даврида кўплаб аёлларда ҳидга нисбатан сезгирлик кучаяди ва аксарият бўёқлар ҳиди ёқимсиз. Кўнгил айниши ва бош оғриғига йўл қўймаслик учун хона яхши вентиляция қилинган бўлиши лозим.

Қўлқоп кийинг. Ҳомиладорлик даврида терининг ҳам сезгирлиги ошиши мумкин, шунинг учун сочни уйда ўзингиз бўясангиз, қўлларга ҳимоя қўлқопини кийишни унутманг.

Болани она сути билан озиқлантириш вақтида соч бўяшдан қўрқишнинг кераги йўқ. Чунки бўёқ таркиби она сутига кирмайди ва процедура чақалоққа зарар етказмайди. “Замин” янгиликларини “Facebook”да кузатиб боринг