Инвесторлар AMDнинг AI бозоридаги имкониятларига шубҳа қилмоқда

AMD компанияси сунъий интеллект тизимларини ўқитишда ишлатиладиган тезлатгичлар бозорида Nvidia'нинг энг йирик рақиби ҳисобланади. Бироқ, Bloomberg'нинг ёзишича, компаниянинг акциялар динамикаси инвесторларнинг бу борадаги ишончсизлигини кўрсатмоқда.

2023-йил ноябр ойидан бери AMD акциялари энг паст даражага тушиб, йил охиридан буён 25% арзонлашди. Таqqосlash учун, Philadelphia Semiconductor Index шу даврда 20% ўсди, Nvidia эса 160% га қимматлашди. 2025-йил 7-феврал куни AMD акциялари яна 0,9% пасайди.

Бунга компания бош директори Лиза Сунинг эҳтиёткорлиги сабаб бўлди. У чораклик ҳисобот тақдимотида AI тезлатгичлар бўйича йиллик прогноз бермади, бу эса инвесторларни хавотирга солди. Аввалроқ, AMD сунъий интеллект соҳасидаги даромадларини батафсил эълон қилган эди, шунинг учун бу сафарги сукут инвесторларни шубҳа остига қўйди. Nvidia жуда катта устунликка эга бўлгани ва AMD AI чипларини бозорга чиқаришда қийинчиликларга дуч келиши мумкинлиги ҳақида хавотирлар пайдо бўлди.

Бироқ, компаниянинг умумий молиявий натижалари ижобий баҳоланмоқда. AMD даромади кутилаётгандан юқори бўлиб, келажак учун оптимистик прогноз берди. 2025-йилнинг биринчи ярмида AI тезлатгичлар савдоси 2024-йилнинг иккинчи ярми даражасида қолиши кутилаяпти. Йил ўрталарида янги авлод тезлатгичлар чиқиши эса компания ривожланишига туртки бериши мумкин.

Шунга қарамай, Citi, Bank of America, HSBC Holdings ва Melius Research компаниялари AMD акцияларининг рейтингини пасайтирди. IDC маълумотларига кўра, Nvidia 2024-йил 3-чорагида глобал сервер график бозорининг 89% улушига эга бўлса, AMD 10,3%, Intel эса атиги 1,1% улушга эга бўлди.

Инвесторлар AMD учун ҳали ҳам умид бор деб ҳисоблашмоқда. Nvidia ва Broadcom сунъий интеллект бозори талабини тўлиқ қондиролмаслиги мумкин. Агар AMD бозор улушини 15% га ошира олса, унинг даромадлари сезиларли даражада ошади. Прогнозларга кўра, компаниянинг 2025-йилдаги даромади 24% га, соф фойдаси эса уч бараварга ошади. 2026-йилда эса ўсиш 21% ва 46% бўлиши кутилмоқда. Бу шуни англатадики, AMD акциялари ҳозирги нархларда барқарорлик белгиларини кўрсатмоқда. “Замин” янгиликларини “Telegram”да кузатиб боринг