Tesla акциялари 25% га тушди – сабаблари нима?

Tesla компанияси ўзининг энг йирик электромобил ишлаб чиқарувчиси мақомини сақлаб қолишда қийинчиликларга дуч келмоқда. Хитойда кучайиб бораётган рақобатчилар ва глобал бозорда Илон Маскнинг сиёсий фаоллиги туфайли компаниянинг бизнеси зарар кўрмоқда. Натижада, Tesla акциялари декабр ойидаги энг юқори нуқтасидан 25% га тушиб кетди.

Bloomberg хабарига кўра, бу ҳафта Tesla акциялари учун октябрдан бери энг ёмон ҳафталардан бири бўлди, чунки улар 11% га пасайди. Январ ойида компаниянинг электромобил сотиш натижалари ҳам бу пасайишга ҳисса қўшди. Масалан, Германияда Tesla етказиб бериш ҳажми 2021 йилдан бери энг паст даражага тушди, Франция ва Буюк Британия ҳам салбий ўсиш кўрсатди. Хитойда эса Tesla автомобилларининг январ ойидаги етказиб бериш ҳажми йиллик ҳисобда 11,5% га, ўтган ойга нисбатан эса 30% дан ортиқ камайди.

Tesla акцияларининг декабр ойида кўтарилиши асосан Илон Маскнинг АҚШ президенти сайловида ғолиб чиққан Дональд Трампга яқинлиги билан боғлиқ эди. Аммо инвесторлар тез орада янги президент электр транспортни субсидиялаш дастурларини қисқартиришни режалаштираётганини англаб етдилар, бу эса Tesla бизнесига салбий таъсир қилади. Европада Маскнинг сиёсий фаоллиги ҳам истеъмолчиларнинг компанияга нисбатан муносабатини ёмонлаштирмоқда. Натижада, Tesla акциялари йил бошидан буён йирик технологик компаниялар – Apple, Microsoft, Nvidia, Alphabet, Amazon ва Meta ичида энг ёмон натижаларни кўрсатди.

Аналитиклар Tesla акциялари яна 2-3 ҳафта давомида тушишини кутмоқда. Баъзи инвесторлар учун бу акцияларни арзон нархда сотиб олиш имконияти бўлиши мумкин. Ҳозирда Tesla акцияларининг баҳоси $362 атрофида бўлиб, $350 даражасида мустаҳкамланиш эҳтимоли бор. Bloomberg’нинг ўртача прогнозига кўра, Tesla акциялари келаси 12 ой ичида $360 атрофида бўлиши кутилмоқда. “Замин” янгиликларини “Telegram”да кузатиб боринг