Ўзбекистонда тадбиркорлар қайси соҳани кўпроқ танламоқда?

2025 йилнинг 1 май ҳолатига кўра, Ўзбекистонда фермер ва деҳқон хўжаликларидан ташқари жами 381 минг 890 та тадбиркорлик субъекти фаолият кўрсатмоқда. Бу ҳақда Миллий статистика қўмитаси томонидан маълум қилинди.

Йил бошидан бери тадбиркорлик субъектлари сони янада ошгани кузатилмоқда. Аниқроқ айтганда, сўнгги тўрт ой ичида бу кўрсаткич 20 минг 97 тага кўпайган. Бу мамлакатимизда кичик бизнес ва хусусий тадбиркорликнинг жадал ривожланиб бораётганидан далолат беради.

Статистика таҳлил қилинганда, тадбиркорлар орасида энг катта қисмини савдо соҳасида фаолият юритаётганлар ташкил қилаётгани маълум бўлди. Ҳозирги вақтда савдо билан шуғулланаётган корхоналарнинг улуши 38,2 фоизни ташкил этади. Бу эса республикамизда тадбиркорликнинг асосий қисми айнан савдо соҳасига йўналтирилганидан далолат беради. Ҳозирча бу йўналишда жами 145 минг 939 та субъект фаолият олиб бормоқда.

Тижорат билан бир қаторда, саноат соҳасида ҳам тадбиркорлар сони ортиб бормоқда. Бугунги кунда бу тармоқда фаолият юритаётган тадбиркорлик субъектлари сони 56 минг 440 тага етган. Бу эса республикамиз саноатидаги кичик бизнес ва хусусий секторнинг ривожланишига ижобий таъсир кўрсатмоқда.

Қишлоқ, ўрмон ва балиқчилик хўжалиги соҳасида фаолият юритувчи корхоналар сони ҳам салмоқли кўрсаткичларни қайд этмоқда. Бу тармоқда ҳозирда 32 минг 242 та тадбиркорлик субъекти фаолият юритмоқда. Айниқса, бу соҳада табиий ресурсларни самарали бошқариш, қишлоқ хўжалиги маҳсулотларини ишлаб чиқариш ҳамда экспорт салоҳиятини ошириш йўлида кичик бизнес катта аҳамият касб этмоқда.

Қурилиш соҳасида эса 28 минг 107 та субъект иш олиб боряпти. Янги бинолар, турар жойлар ва инфратузилма объектлари қуришда тадбиркорларнинг иштироки тобора ортиб бормоқда. Бу соҳада тадбиркорлар фаоллиги шаҳарларнинг замонавий қиёфасини шакллантиришга катта ҳисса қўшмоқда.

Яшаш ва овқатланиш бўйича хизмат кўрсатиш соҳасида ҳам тадбиркорлик субъектлари сони тобора кўпаймоқда. Ҳозирги вақтда бу йўналишдаги корхоналар сони 27 минг 784 тани ташкил этади. Бунда асосан меҳмонхоналар, ресторанлар, кафе ва бошқа турдаги умумий овқатланиш объектлари назарда тутилмоқда.

Транспорт, ташиш ва сақлаш соҳасида 16 минг 188 та тадбиркорлик субъекти мавжуд бўлиб, улар ҳам иқтисодиётимизнинг муҳим қисмига айланиб бормоқда. Ахборот ва алоқа соҳасидаги тадбиркорлар сони эса 10 минг 16 тани ташкил қилмоқда. Соғлиқни сақлаш ва ижтимоий хизмат кўрсатиш соҳаси ҳам тадбиркорларни жалб қилишда жадал суръатларда ўсиб, ҳозирги вақтда 9 минг 532 та субъект фаолият кўрсатяпти.

Шунингдек, бошқа турли хил йўналишларда фаолият юритаётган тадбиркорлик субъектлари сони 55 минг 642 тани ташкил этмоқда.

Умуман олганда, Ўзбекистонда кичик бизнес ва хусусий тадбиркорлик жадал ривожланиб бормоқда. Давлат томонидан тадбиркорларга яратилаётган имтиёзлар, молиявий кўмак ва шароитлар бу соҳанинг янада ривожланиши учун кенг имкониятлар яратмоқда. Бу эса, ўз навбатида, аҳолининг иш билан бандлигини таъминлаш, иқтисодий барқарорликни мустаҳкамлаш ва мамлакат тараққиётини юқори босқичга кўтаришга хизмат қилмоқда. «Замин»ни Telegram’да ўқинг!