Криптовалюталар билан боғлиқ жиноятлар сони ортмоқда

Молиявий жиноятлар билан курашиш бўйича халқаро ташкилот — ФАТФ (Financial Action Task Force) жорий йилнинг июн ойида виртуал активлар (яъни криптоактивлар) билан боғлиқ молиявий жиноятларга қарши курашишда ҳукуматларни кучлироқ чоралар кўришга чақирди. Ташкилот баёнотида таъкидланишича, криптоактивлар билан боғлиқ регламентация борасида ижобий силжишлар кузатилган бўлса-да, ҳали ҳамон кўплаб давлатлар хавфларни бартараф этишда орқада қолмоқда.

2025-йилнинг апрель ҳолатига кўра, баҳоланган 138 мамлакатдан атиги 40 таси ФАТФънинг криптоактивлар бўйича стандартларига “асосан мувофиқ” деб топилган. Бу рақам 2024-йилга нисбатан бироз кўпроқ бўлса-да, бу соҳада глобал даражада жиддий бўшлиқлар мавжудлигини кўрсатади.

ФАТФ баёнотида: “Виртуал активларнинг чегараларсиз табиати сабабли, бир давлатдаги регламентация бўшлиги глобал молиявий тизимга таҳдид солиши мумкин”, — деб огоҳлантирилди.

Криптоактивлар орқали $51 миллиардгача ноқонуний транзакция амалга оширилган
2024-йилда ноқонуний криптоҳамёнлар $51 миллиардгача маблағ олган бўлиши мумкин, дея хабар бермоқда блокчейн таҳлил компанияси Chainalysis. Аксарият ноқонуний фаолиятлар ҳозирда барқарор криптовалюталар — stablecoin'лар орқали амалга оширилмоқда. Бу активлар ўз қийматини АҚШ доллари ёки бошқа валюталарга боғлаб ушлаб туради ва шу сабабли улардан ноқонуний мақсадларда фойдаланиш осонлашади.

ФАТФ хусусан, Шимолий Корея, террорчиликни молиялаштирувчилар ва гиёҳванд модда савдогарлари томонидан stablecoin'лардан фойдаланилиши ҳақида огоҳлантирди. АҚШ Федерал Қидирув Бюроси (ФБИ)га кўра, 2025-йилнинг феврал ойида ByBit крипто биржасидан $1,5 миллиард виртуал активлар ўғирланган. Бу — тарихдаги энг йирик крипто ўғирликлардан бири бўлди. Мазкур ҳодисада Шимолий Корея иштирок этгани гумон қилинмоқда.

Европа Иттифоқининг қимматли қоғозлар бўйича назоратчи ташкилоти ҳам криптоактивлар ва анъанавий молиявий бозорлар ўртасидаги алоқалар чуқурлашаётганини инобатга олган ҳолда, кенгайиб бораётган криптосектор молиявий барқарорликка хавф туғдириши мумкинлигини айтди. «Замин»ни Telegram’да ўқинг!