Украинанинг Open4business ҳамда Fixygen интернет нашрларида Озарбойжоннинг SOCAR компанияси Ўзбекистон ҳудудида нефть конини ўзлаштиришга киришгани ҳақида мақолалар эълон қилинди. Ушбу маълумот Озарбойжон президенти Илҳом Алиев томонидан 22 август куни Туркманбоши шаҳрида бўлиб ўтган уч томонлама саммитда – Ўзбекистон президенти ва Туркманистон халқ маслаҳати раиси билан учрашув чоғида билдирилган.
Мақолада қайд этилишича, Алиев ўз нутқида лойиҳа ҳақида алоҳида тўхталиб, қуйидагича фикр билдирган:
“Бизда Туркманистон билан анъанавий энергетика соҳасидаги ҳамкорлик мавжуд. Энди эса Ўзбекистон билан ҳам ушбу йўналишда ҳамкорлик йўлга қўйилди. Бизнинг SOCAR давлат нефт компаниямиз Ўзбекистонда нефт конини ўзлаштиришга киришди, шартнома имзоланди”.
Нашрда таъкидланишича, Озарбойжон яқин йилларда ушбу ташаббусдан “ижобий янгиликлар” кутаётганини билдирган.
Лойиҳанинг қиймати тахминан 2 миллиард долларга баҳоланмоқда. Яқин беш йил ичида SOCAR оператор сифатида камида 1000 квадрат километр майдонда 3D сейсмик тадқиқотлар ўтказиши ва ҳеч бўлмаса битта қудуқ қазиши белгиланган. Агар саноат даражасида йирик кон аниқланса, икки давлат уни ўзлаштириш ишларига киришади.
Мутахассислар прогнозига кўра, эҳтимолий захиралар 100 миллион тоннагача нефть ва 35 миллиард куб метр газдан иборат бўлиши мумкин.
Шу билан, мазкур қадам нафақат Ўзбекистон энергетика соҳасида муҳим босқич сифатида, балки икки давлат ўртасидаги ҳамкорликнинг янги пойдевори сифатида ҳам қаралмоқда.
«Замин»ни Telegram’да ўқинг!
