Қорақалпоғистондаги Устюрт платосидан жуда катта газ захираси аниқлангани ҳақида Президент Шавкат Мирзиёев 15 сентябрь куни халқ билан мулоқот чоғида маълум қилди. Давлат раҳбарининг таъкидлашича, бу янгилик нафақат мамлакатимиз саноати, балки бутун минтақамиз иқтисодий истиқболлари учун улкан аҳамиятга эга бўлади.
Президентга кўра, Ўзбекистон еростида бой ва серқирра қазилма захиралари мужассам. Илгари нефт ва газ соҳаларида қидирув ва қазиб чиқариш ишлари асосан 2,5–3 минг метр чуқурликда амалга ошириларди. Бироқ бу йил илк бор мамлакатимиз саноат тарихида беқиёс қадам қўйилди — Устюрт ҳудудида 6,5 минг метр ер қаърига кириб борилди ва натижада катта газ захираси топилди. Бу эса геология соҳасида янги давр бошланганини англатади.
Давлат раҳбари шунингдек, бугунги кунда «тўртинчи саноат инқилоби»ни амалга оширишда технологик ресурслар асосий омилга айланаётганини қайд этди. Айниқса, теллур, литий, селен, графит, молибден каби минералларга талаб бутун дунёда кескин ўсмоқда. Таҳлиллардан келиб чиққан ҳолда, Ер шаридаги вольфрам, молибден, рух ва титан каби муҳим ресурсларнинг 10–15 фоизи бевосита бизнинг минтақамизга тўғри келиши эътироф этилди.
Президент Мирзиёев таъкидлаганидек, «ушбу улкан ресурсларни юқори қўшилган қийматли маҳсулотга айлантириш учун нафақат технология ёки сармоя, балки аввало илм, билим ва инновация зарур». Унга кўра, фақат ана шундай йўл орқали табиий бойликлардан кенг ва самарали фойдаланиш, мамлакат тараққиётини янги босқичга олиб чиқиш мумкин бўлади.
Мутахассислар фикрича, Устюрт платосида топилган ушбу улкан газ захираси нафақат энергетика соҳасини қувватлантиради, балки бутун иқтисодий тизимга катта суръат беради. Шу тариқа, Ўзбекистоннинг табиий ресурслар соҳасидаги истиқболлари янада кенгайиши кутилмоқда.
«Замин»ни Telegram’да ўқинг!
