Центрум Air рейси чақмоқ уриши сабабли кечиктирилди
Сентрум Air авиакомпаниясининг Тошкент — Гуанчжоу — Тошкент йўналишидаги рейси ҳаво кемасига чақмоқ уриши сабабли мажбурий равишда кечиктирилди. Авиация хавфсизлиги стандартларига мувофиқ самолёт эксплуатациядан чиқарилиб, тўлиқ техник кўрик, диагностика ва зарур тиклаш ишларидан сўнг бошқа ҳаво кемасига алмаштирилди. Кутиш даврида барча йўловчилар меҳмонхонага жойлаштирилди ва уч маҳал иссиқ овқат билан таъминланди.
Центрум Air авиакомпанияси Тошкент — Гуанчжоу — Тошкент йўналишидаги рейс мажбурий равишда кечиктирилганини маълум қилди. Бунга аввалги парвозни амалга оширган ҳаво кемасининг парвоз вақтида чақмоқ уришига учрагани сабаб бўлган. Бу ҳақда Uzdaily.uz хабар беради.
Авиация хавфсизлиги стандартларига мувофиқ, самолёт зудлик билан эксплуатациядан чиқарилди. Мутахассислар томонидан тўлиқ техник кўрик, диагностика ва зарур тиклаш ишлари олиб борилди. Текширув якунларига кўра, компания хавфсизликни таъминлаш мақсадида ушбу йўналишда бошқа ҳаво кемасидан фойдаланишга қарор қилди.
Ушбу ўзгаришлар 16-май куни амалга оширилиши керак бўлган қайтиш рейсининг кечикишига олиб келди. Авиакомпания маълумотига кўра, кутиш даврида йўловчилар меҳмонхонага жойлаштирилди ва уч маҳал иссиқ овқат билан таъминланди.
Янги жадвалга кўра, рейснинг Гуанчжоудан учиб кетиши 18-май куни маҳаллий вақт билан соат 20:25 га белгиланди. Самолётнинг Тошкентга етиб келиши эса 19-май куни соат 00:50 га режалаштирилган.
Изоҳлар 0
…