Суперконтракт ўзи аслида яхши эмас. У иложсизликдан ўйлаб топилган усул. Лекин бозор иқтисодиётига ўтиш даврида керак. Бу ҳақда Тошкент давлат иқтисодиёт университети ректори Конгратбай Шарипов журналистлар билан мулоқотда фикр билдирди.
Конгратбай Шариповнинг айтишича, суперконтрактнинг яхши ва ёмон томонлари бор.
“Абитуриент айнан шу университетда ўқийман, бошқасида ўқишни истамайман, деса биз унга имконият беряпмиз: марҳамат, контрактни тўлаб, ўқийвер, деб. Ўзи аслида суперконтракт яхши эмас. У иложсизликдан ўйлаб топилган усул. Лекин бозор иқтисодиётига ўтиш даврида керак бўлмоқда”, — деди ректор.
“Суперконтрактни яхши томони бизнинг университетда 700-800 нафар ижтимоий ҳимояга муҳтож талабалар бор. Уларни қўллаб–қувватлаш учун йилига ҳар бирига 5 миллион сўмгача пул берамиз. Биз ўзини ўзи молиялаштирадиган университет бўлганимиз учун манба ҳам ўзимизда. Бизда бошқа даромад манбаи йўқ. Шу билан бирга, ётоқхоналарга қўшимча жойлар яратамиз, қурилишлар қиламиз. Чет элдан келадиган профессор-ўқитувчилар бор. Уларнинг маоши юқори—ойига камида 2-3 минг доллардан тўлашимиз керак. Яъни бу пулларнинг барчаси мақсадли ишлатилади”, — деди у.
Ректорнинг қўшимча қилишича, у раҳбарлик қилаётган университетда суперконтракт ўринлари камайтирилмоқда.
Бундан олдинги йилларда 640 та ўрин ажратилган бўлса, ўтган йили 330 та ажратилган. Бу йил ундан ҳам камайиши мумкин. Энг қизиғи, биз 3 йилдан бери суперконтракт нархини оширмадик. Масалан, талаба Туризм факультетида ўқиса, контракт 6 миллион сўм. Суперконтракт эса шунинг 10 баробари — 60 миллион сўм”, — деди Конгратбай Шарипов.
Аввалроқ соғлиқни сақлаш вазири Амрилло Иноятов ҳукуматга тиббиётда суперконтрактни йўқотиш бўйича таклиф киритилганиниайтганди.
“Суперконтракт масаласида фикрим ижобий эмас. Тиббиётда ўқиш осонмас. Гап талабанинг ўқишида ва бизнинг филтримизда. Хоҳлаган талаба суперконтрактга кириши мумкин, бутун дунёда тенденция шунақа. Энг асосийси, биз филтрни халқаро талаблар даражасида қилиб қўйсак, талабалар ўз-ўзидан филтрланади”, — деган у.
