Юрист мигрантларни Россиядаги наркокурерлик оқибатларидан огоҳлантирди

Миграция масалалари бўйича эксперт Ботиржон Шермуҳаммад Россиядаги ўзбек ватандошларини пул учун наркокурерликка ёлланиш ва унинг оғир оқибатларидан огоҳлантирди.

Ботиржон Шермуҳаммадга кўра, охирги йилларда Россияда наркокурерлик фаолияти ва бу фаолиятга асосан муҳожирларни жалб қилиш ҳолатлари кўпайиб бормоқда.

“Бундай ишларга кўп ҳолатларда ўзбек ёшлари аралашиб қоляпти. Мендаги маълумотларга кўра, ёшларда наркотикка эмас, бу фаолиятдан келадиган вақтинча даромадга қизиқиш катта. Уларни ана шу вақтинча даромад алдаб қўймоқда.

Шундай бўлса-да, мен ёшларимизнинг нега шу ишларга аралашаётганига ҳайронман, чунки улар бу жиноят учун жазо катта эканини билишади. Ҳа, бундай ишларни билмасдан қиляпти, дейиш қийин, асосий ҳолатда ўзлари билиб қиляпти.

Бугун курерларнинг ҳар битта хизмати 300-700 рубл оралиғида экан — бу катта пул эмас. Бир кунда 20-30 та жойга етказиб берганда ҳам, кунига 100 доллар пул топиши мумкин. Аммо буларнинг бари катта хавф, таваккал ҳисобига бўлади-ку.

Курерларнинг фаолияти 2-3 ойдан кўпга бормайди. Чунки улар ўртача шунча вақтда қўлга тушади ҳамда узоқ йилга қамалади”, – деди юрист.

Мутахассиснинг қўшимча қилишича, мигрантларни шу каби ишларга ёллаш ва уларни узоқ йилга қамашдан Россиядаги манфаатдор томонлар ҳам бўлиши мумкин. У бу борада норкокурерлик билан шуғулланган ва қўлга тушганларнинг барча маълумотлари ички ишлар органларида топилаётганига эътибор қаратди.

“Қизиқ жиҳати, ички ишларда ушланган наркокурерлар ҳақида барча даллилларнинг бўлиши. Улар ким, қаерга, қанча наркотик олиб борган - барчасини далиллари билан кўрсатиб беряпти. Билишимча, дори тарқатадиганлар ва ички ишлар ходимлари ўртасида тизим ишлайди. Ходимлар ҳар ойда ўзини кўрсатиш учун дори тарқатувчи билан келишиб, 2-3 та курерни ушлаб бераётган бўлиши мумкин. Бу ҳақида россиялик журналистлар ҳам ёзяпти. Бу тизимда фақат курерлар қурбон бўлади.

Наркокурерлик шундай ташкил қилинадики, курер иш берувчисини танимайди, ҳатто операторлар ҳам шахсини яшириб мулоқот қилади. Ҳатто шантаж ҳам қилишар экан, яъни бизга ишлашда давом этмасанг, қилган ишларингни полицияга топширамиз, дейишар экан. Бу ишга кириб қолса, чиқиш ҳам қийин”, – дейди Ботиржон Шермуҳаммад.

Янгиликлар