Тошкентда 310 км/соат тезликда ҳаракатланган мотоцикл ҳайдовчиси жарима қўлланди

^{Видеолавҳалардан кадрлар}
Тошкентда мотоцикл ҳайдовчиси тезликни 310 км/соатгача олиб чиққани акс этган видеони Instagram'га жойлади.

Пойтахт ИИББ ЙҲХБ матбуот котиби Қаҳрамон Худойберганов маълум қилишича, ҳайдовчига МЖтКнинг 128-3-моддаси билан баённома расмийлаштирилган. Бу моддада 9 БҲМ – 3,37 млн сўм жарима жазоси кўзда тутилган.

Қаҳрамон Худойберганов мотоцикл ҳайдовчисига нечта ҳолат бўйича баённома тузилганига аниқлик киритмаган. Блогер жойлаган видеода қоидабузарлик камида икки марта содир этилганини кўриш мумкин: ҳайдовчи BMW S1000RR русумли мотоциклда тезликни 310 км/соатгача, Yamaha R1 русумли мотоциклда эса 299 км/соатгача олиб чиққан.

Бундан ташқари, қоидабузарнинг Instagram саҳифасида у аввал ҳам тезлик билан боғлиқ қоидабузарликлар содир этгани акс этган видеоларни кўриш мумкин.

Ўзини “Ўзбекистондаги биринчи мотоблогер” деб таърифловчи шахс ЙҲХБ матбуот котибининг саволига жавобан 310 км/соат тезликда ҳаракатлангани акс этган видеосини август ойларида олганини айтган ва бу ҳолат “бошқа қайтарилмаслиги”га ваъда берган.

“Тарихда биринчи марта ЙПХ ходими 310 тезликка протокол тузяпти. Энди савол-да, 310 тезликка “штраф” неч пул бўлади? Ким нима деб ўйлайди?” – дея кулган у сторисга жойлаган видеосида.

“Ҳаммага раҳмат. Асосийси, контентни тўхтатмаймиз”, – деган у бошқа бир сторисда.

Қоидабузар тезлиги билан мақтанган видеосини саҳифасидан ўчириб юбормаган. “Замин” янгиликларини “Youtube”да кузатиб боринг